Iran óz ıadrolyq reaktorlary úshin 20 paıyzǵa deıin baıytylǵan ýran óndiretin bolady- Ahmadınejad
ASTANA. Jeltoqsannyń 3-i. QazAqparat - Iran óz betinshe 20 paıyzǵa deıin ýran baıytady, dep málim etti Iran Prezıdenti Mahmud Ahmadınejad el telearnasy translıatsııalaǵan sózinde.
Degenmen, Iran basshysy Tegrannyń ıadrolyq qarý jasamaıtynyn basa atap kórsetti, dep habarlaıdy Associated Press agenttigi.
Iran Islam Respýblıkasynyń túrli resmı tulǵalarynyń habarlaýynsha, 20 paıyzǵa deıin baıytylǵan ýran medıtsına muqtajdyǵy úshin paıdalanylatyn reaktor úshin qajet.
Osynyń aldynda ǵana Irannyń Atom energııasy jónindegi halyqaralyq agenttikpen (MAGATE) yntymaqtastyǵyn qysqartqany málim bolǵan edi. Qarashanyń 29-ynda el parlamenti osyndaı sheshim qabyldady. Bul qadam Qum qalasynyń mańynda ýran baıytý jónindegi qupııa zaýyttyń qurylysy úshin Irandy aıyptap, qarar qabyldaǵan MAGATE basqarýshylar keńesiniń sheshimine Tegrannyń bergen jaýaby bolyp otyr.
AQSh, Reseı, Qytaı, Ulybrıtanııa, Frantsııa jáne Germanııa elderi Tegranmen ýrandy syrt elde baıytyp baryp, el aýmaǵyna qaıtarý týraly kelisimge nıetti bolǵan edi. Biraq qarashanyń 29-ynda Iran úkimeti ýran baıytý jónindegi 10 jańa zaýyttyń qurylysyn maquldady. M.Ahmadınejadtyń aıtýynsha, Iran ýrandy 20 paıyzǵa deıin baıytý deńgeıine shyǵýy jáne jylyna 250-300 tonna ıadrolyq otyn óndirýi kerek.
