Iran: Ormýz buǵazyndaǵy keme qatynasynyń qashan jandanatyny AQSh-qa baılanysty
ASTANA. KAZINFORM – Iran qajetti sharttar oryndalǵan jaǵdaıda Ormýz buǵazyndaǵy keme qatynasyn jeti kún ishinde qalpyna keltirýge bolatyn jospardy AQSh-qa usyndy. Bul týraly juma kúni Irannyń syrtqy ister mınıstri Abbas Aragchı málimdedi, dep habarlady Sınhýa agenttigi.
A.Aragchıdiń aıtýynsha, Iran AQSh-qa Katar arqyly «jeti kúnge arnalǵan naqty jospar» joldaǵan. Onyń sózinshe, jeti kúndik merzim Vashıngton osy jospardy qabyldaǵan sátten bastap esepteledi.
Josparǵa sáıkes, AQSh belgili bir sharalardy qabyldaýy kerek. Irannyń baǵalaýynsha, bul sharalardy júzege asyrýǵa tórt-bes kún qajet bolýy múmkin. Al altynshy kúni buǵaz ashylady.
– Jetinshi kúni AQSh-pen ózara kelisilgen máseleler boıynsha túpkilikti kelisimge qol jetkizý úshin kelissózder bastalady, – dep túsindirdi A.Aragchı.
Mınıstrdiń aıtýynsha, AQSh oryndaýy tıis barlyq shara jańa talaptar emes. Olar maýsym aıynda eki el basshylary qol qoıǵan ózara túsinistik týraly memorandýmda buǵan deıin qamtylǵan.
– Eger amerıkalyq tarap kelisimge kelip, Ormýz buǵazyn qaıta ashýǵa shyndap nıetti bolsa, onda barlyǵy daıyn ekenin aıta alamyn. Endi tańdaý Amerıka Qurama Shtattarynyń qolynda, – dedi A.Aragchı.
Mınıstr Irannyń qysymǵa, qoqan-loqy men qorqytýǵa jol bermeıtinin jáne qysym jaǵdaıynda óziniń egemendik quqyqtarynan bas tartpaıtynyn atap ótti.
18 maýsymda AQSh pen Iran Lıvandy qosa alǵanda, aımaqtaǵy barlyq maıdanda soǵysty toqtatý jóninde ózara túsinistik týraly memorandýmǵa qol qoıǵan. Qujatqa sáıkes, taraptar túpkilikti kelisimge qol jetkizý úshin 60 kún ishinde, ıaǵnı 17 tamyzǵa deıin kelissóz júrgizýi kerek bolǵan. Alaıda eki el arasyndaǵy qarym-qatynastyń sońǵy kezderi shıelenisýine baılanysty bul kelissózderdiń taǵdyry ázirge belgisiz.
Eske sala ketsek, Tramp Irannyń bitimge kelý týraly usynysynan bas tartqanyn rastady.
