Iran Ormýz buǵazynda úshinshi alyp munaı tankerine soqqy bergenin málimdedi
ASTANA. KAZINFORM – Irannyń Islam revolıýtsııasy saqshylary korpýsy 12 qazan kúni tańerteń Ormýz buǵazy arqyly ótpek bolǵan úshinshi alyp munaı tankerine soqqy jasalǵanyn habarlady, dep jazady Anadolu.
Iran tarapynyń málimetinshe, shamamen 2 mıllıon barrel munaı tasymaldaýǵa qaýqarly sýpertanker navıgatsııalyq júıelerin óshirip, Ormýz buǵazy arqyly ótýge árekettengen.
Islam revolıýtsııasy saqshylary korpýsynyń málimdemesinde keme buǵazdaǵy belgilengen tártip pen qaýipsizdik talaptaryn buzýǵa tyrysqany aıtylǵan.
– Tanker navıgatsııalyq júıelerin óshirip, Ormýz buǵazy arqyly ótýge árekettendi. Osyǵan baılanysty Iran qarýly kúshteri kemege oq jaýdyryp, nátıjesinde onyń bortynda órt shyqty, – delingen korpýs málimdemesinde.
Ázirge tankerdiń ataýy, ekıpaj músheleriniń jaǵdaıy jáne kemege keltirilgen zalal týraly tolyq málimet jarııalanǵan joq. Iran tarapynyń málimdemesi táýelsiz derekkózder arqyly rastalǵan joq.
Buǵan deıin Iran bıligi 8 shildede AQSh shabýyldary qaıta bastalǵanyna jaýap retinde 12 shildede Ormýz buǵazyn qaıta japqanyn jarııalaǵan edi.
Tegeran Iran belgilegen baǵyttan tys qozǵalatyn nemese ruqsatsyz ótetin kemelerge soqqy jasalatynyn eskertken.
Aıta keteıik, buǵan deıin 12 qazanda Ormýz buǵazynyń ońtústik bóliginde iri munaı tankeri mınaǵa soǵylyp, órtengeni habarlanǵan bolatyn. Iran tarapy bul sońǵy eki táýliktegi úshinshi osyndaı oqıǵa ekenin málimdegen.
