Iran Ormýz buǵazynda munaı tankeri órtengenin habarlady
ASTANA. KAZINFORM — Munaı tankeri teńiz mınasyna jarylyp, Ormýz buǵazynyń shyǵys bóliginde órtengen. Bul týraly Iran Áskerı-teńiz kúshteri qolbasshylyǵynyń Qoǵammen baılanys basqarmasy málimdedi, dep jazady Anadoly.
Habarlamaǵa sáıkes, oqıǵa búgin tańerteń buǵazdyń shyǵys bóliginde bolǵan.
— Búgin tańerteń buǵan deıin berilgen eskertýlerge qaramastan, baqylaý jáne sáıkestendirý júıelerin óshirip, Ormýz buǵazynyń shyǵys bóligindegi qaýipti ári jabyq aımaq arqyly ótken munaı tankeri teńiz mınasyna jarylyp, órtenip, toqtap qaldy, — delingen habarlamada.
Irannyń áskerı vedomstvosy Ormýz buǵazynyń shyǵys bóligindegi «jabyq aımaq» arqyly ótetin kez kelgen kemeniń mınaǵa jarylyp, órtený qaýpi bar ekenin eskertti.
Sondaı-aq vedomstvonyń habarlaýynsha, basqa kemelermen bolǵan oqıǵalarǵa qaramastan, keme ıeleri AQSh-tyń qoldaýyna senip, tankerlerdi mına qoıylǵan sýlar arqyly jiberýdi jalǵastyryp keledi.
12 shildede Iran 8 shildede AQSh shabýyldary qaıta bastalǵannan keıin Ormýz buǵazyn qaıta jabatynyn málimdegen.
Tegeran buǵaz arqyly «ruqsatsyz» ótetin nemese Iran bıligi belgilegen baǵyttan aýytqıtyn kemelerge soqqy jasaıtynyn eskertken.
Buǵan deıin Ormýz buǵazynda eki iri munaı tankeri men býksırden órt shyqqany belgili boldy. Tankerlerdiń biri Tegeranmen kelisilmegen baǵytpen ótýge áreket jasaǵan kezde teńiz mınasyna jarylǵan
