Iran Ormýz buǵazynda AQSh-tyń barlaý dronyn qolǵa túsirgenin málimdedi
ASTANA. KAZINFORM — Iran Islam revolıýtsııasy saqshylar korpýsynyń (IRSK) áskerı-teńiz kúshteri Ormýz buǵazynyń batys bóliginde AQSh-tyń barlaý maqsatynda paıdalanylǵan ushqyshsyz ushý apparatyn qolǵa túsirgenin málimdedi. Bul týraly Tasnim basylymy jazdy.
IRSK áskerı-teńiz kúshteri baspasóz qyzmetiniń málimetinshe, radıoelektrondyq kúres bólimsheleri MQM-170 úlgisindegi ushqyshsyz ushý apparatyn anyqtap, ony basqarýdy óz qoldaryna alǵan.
Iran tarapynyń málimdeýinshe, áskerı qyzmetkerler apparattyń nysanaǵa baǵyttaý jáne basqarý júıelerine baqylaý ornatqan. Osydan keıin dron májbúrli túrde jerge qondyrylǵan.
IRSK ókilderiniń aıtýynsha, atalǵan apparat Parsy shyǵanaǵy men Ormýz buǵazynyń jaǵalaýyndaǵy Irannyń áýe shabýylyna qarsy qorǵanys júıelerin anyqtaý úshin paıdalanylǵan.
Iran áskerı kúshteriniń málimetinshe, dronnan alynǵan aqparatty taldaý nátıjesinde onyń Parsy shyǵanaǵynyń ońtústik jaǵalaýynda ornalasqan elderdiń biriniń aýmaǵynan ushyp shyqqany anyqtalǵan.
Alaıda ázirge oqıǵanyń mán-jaıy táýelsiz derekkózder arqyly rastalǵan joq.
Buǵan deıin AQSh Qarýly kúshteriniń Ortalyq qolbasshylyǵy (CENTCOM) Irannyń Ormýz buǵazyna baqylaý ornatqany týraly málimdemesin joqqa shyǵarǵan bolatyn. Amerıkalyq qolbasshylyq AQSh áskerı qyzmetshileri men óńirdegi seriktes elderdiń kúshteri buǵazdy baqylaýda ustap otyrǵanyn málimdedi.
Sonymen qatar buǵan deıin IRSK Ormýz buǵazyna jaqyndaǵan jaǵdaıda AQSh-tyń áskerı kemelerine shabýyl jasaıtynyn eskertken edi.
