Iran Ormýz buǵazynan ótý tártibin buzǵan kemelerdi tárkileıtinin málimdedi
ASTANA. KAZINFORM — Iran Tegeran belgilegen Ormýz buǵazy arqyly ótý tártibin buzǵan kemelerge aıyppul salynatynyn, sondaı-aq olardyń tárkilenýi múmkin ekenin eskertti, dep habarlaıdy Kazinform agenttiginiń menshikti tilshisi.
Irannyń Parsy shyǵanaǵy men Ormýz buǵazy basqarmasy (PGSA) jeksenbi kúni strategııalyq mańyzy bar aýmaqta Irannyń keme qatynasyna qatysty talaptaryn saqtamaıtyn kemelerge shekteý engizilgenin málimdedi. Atap aıtqanda, buǵazdan ótkende tártip buzǵan keme kelesi saparynda toqtatylyp, aıyppul salynýy, keı jaǵdaıda tárkilenýi múmkin.
PGSA, sondaı-aq, Iran bıligi tártip buzdy dep sanaıtyn kemelerdiń tizimin jarııalady. Parsy shyǵanaǵyna nemese Parsy shyǵanaǵynan júk tasymaldaýshylarǵa keme jaldamas buryn osy tizimmen tanysyp alý usynyldy.
Sonymen qatar bul shekteýler tizimdegi kemelerge ózara baılanysty bar, ıaǵnı olardan júk artqan ne júk tıep alǵan, sondaı-aq júkti ózine qotaryp tıegen kemelerge de qatysty bolady.
Kemeni bul tizimnen shyǵarý úshin ıesi nemese operatory Irannyń teńiz qatynasy jónindegi bıligine resmı ótinish berip, tıisti túsinikteme usynýy qajet.
Axios basylymy buǵan deıin AQSh áskerıleriniń Ormýz buǵazynda Oman jaǵalaýynyń ońtústik bóligi arqyly tankerler qatynaıtyn balama baǵyt uıymdastyrǵanyn habarlaǵan edi. Basylymnyń málimetinshe, bul baǵyt arqyly túngi ýaqytta shamamen 15-20 tanker ótedi.
Olar táýligine jalpy kólemi 10 mıllıon barrelge jýyq munaı tasymaldaıdy.
Buǵan deıin Vashıngton Tegeranǵa ekonomıkalyq qysymdy kúsheıtkenin habarlaǵan bolatyn, Irannyń bul málimdemesi soǵan tuspa-tus jasaldy.
Odan bólek, AQSh prezıdenti Donald Tramp Iranǵa ekonomıkalyq qoldaý kórsetetin ári saýda-ekonomıkalyq baılanystaryn jalǵastyratyn elderge sanktsııa salatynyn eskertken.
Aıta keteıik, Iran mamyr aıynda Parsy shyǵanaǵy men Ormýz buǵazy basqarmasyn qurǵan bolatyn.
Aýdarǵan: Aqzat Jıenalına
