Iran Ormýz buǵazyn japty
ASTANA. KAZINFORM — Iran Qarýly kúshteriniń «Hatam ál-Anbııa» ortalyq shtaby Ormýz buǵazynyń keme qatynasy úshin jabylǵanyn málimdedi. Bul týraly Fars agenttigi habarlady.
Mundaı sheshim Izraıl áskeriniń Lıvan aýmaǵyna jasaǵan soqqylaryna jaýap retinde qabyldanǵan.
— AQSh soǵysty toqtatý jónindegi kelisimniń alǵashqy tarmaǵyn oryndaýdan ashyq túrde bas tartyp, óz mindettemelerin buzdy. Sonymen qatar Lıvannyń ońtústigindegi atysty toqtatý rejımi úzdiksiz buzylyp otyr. Júzdegen myń beıbit turǵyn qaza taýyp, májbúrli túrde qonys aýdardy. Izraıl kúshteri Lıvannyń ońtústiginen ketýden bas tartqanyn eskere otyryp, Ormýz buǵazy kemelerdiń ótýi úshin jabylatynyn málimdeımiz, — delingen shtab málimdemesinde.
Áskerı qolbasshylyq bul qarsy taraptyń senimge selkeý túsirgen áreketine jaýap retindegi alǵashqy qadam ekenin atap ótti.
Sondaı-aq agressııa jalǵasqan jaǵdaıda qarsylasty óz mindettemelerin oryndaýǵa májbúrleý úshin qosymsha sharalar qabyldanatyny eskertildi.
Eske salaıyq, 15 maýsymǵa qaraǵan túni Iran, Pákistan, men Amerıka Qurama Shtattary Vashıngton men Tegeran arasyndaǵy beıbit kelisim jasalǵanyn málimdegen bolatyn.
Taraptar barlyq baǵytta, sonyń ishinde Lıvan aýmaǵynda áskerı áreketterdi dereý jáne túpkilikti toqtatýǵa kelisken.
Keıin 19 maýsymda Shveıtsarııa aýmaǵynda ótýi tıis AQSh pen Iran arasyndaǵy tehnıkalyq kelissózderdiń keıinge shegerilgeni belgili boldy.
Kezdesý keıinge qaldyrylǵanyna qaramastan, AQSh Ormýz buǵazy arqyly keme qatynasyna qoıylǵan shekteýlerdi alyp tastaǵanyn habarlaǵan.
Al Iran óz kezeginde buǵaz arqyly ótetin kemelerden aqy alynbaıtynyn málimdegen edi.
