Iran Ormýz buǵazyn tolyq jaýyp tastaýy múmkin

ASTANA. KAZINFORM — Iran bıligi AQSh prezıdenti Donald Tramptyń ýltımatýmyna jaýap qatty. Bul týraly  DW agentti jazdy. 

Iran armııasynyń komandalyq quramy AQSh-qa baǵyttalǵan jaýabyn memlekettik telearna arqyly jarııalady.

– Eger AQSh-tyń Irandaǵy elektr stantsııalarǵa qatysty qaýipteri júzege assa (...), onda Ormýz buǵazy tolyq jabylady jáne bizdiń buzylǵan elektr stantsııalarymyz qalpyna keltirilgenshe ashylmaıdy – dedi.

Iran Ormýz buǵazyn AQSh pen Izraıl soǵysy bastalǵannan keıin jaýyp tastady. Buǵaz arqyly buryn álemdik munaı eksportynyń shamamen 20%-y ótetin. Qazir munaı baǵasy kúrt ósti. Biraq bul – Tegeran jarııalaǵan blokadanyń jalǵyz saldary emes.

Ormýz buǵazy álemdik teńiz arqyly tyńaıtqysh saýdasynyń shamamen úshten bir bóligin qamtamasyz etetin. Jetkizilimdegi úzilister azyq-túlik baǵasynyń qymbattaýyna jáne keı aımaqtarda tapshylyqqa ákelýi múmkin dep BUU eskertedi.

Soǵys bastalǵaly ártúrli tyńaıtqysh túrleriniń bırjalyq baǵasy 10–30% ósti. Bul – kóktemgi egistikke deıingi kezeńde oryn alyp otyr, ıaǵnı tyńaıtqyshqa suranys óte joǵary kezde. Reseı, Qytaı, AQSh jáne Marokko sııaqty iri óndirýshilerdiń rezervtik qýattary bul tapshylyqty tolyq óteı almaıdy.

Eske sala keteıik, buǵan deıin Tramp Iranǵa Ormýz buǵazyn ashý úshin 48 saǵat ýaqyt bergen edi.