Iran Ormýz buǵazyn qaıta japty
ASTANA. KAZINFORM – Iran AQSh tarapynan jalǵasyp jatqan teńiz blokadasyna baılanysty Ormýz buǵazynyń qaıta jabylǵanyn málimdedi. Bul týraly ırandyq BAQ Iran Qarýly kúshteriniń soǵys qımyldaryn júrgizýge jaýapty «Hatem ál-Anbııa» ortalyq shtaby jarııalady, dep habarlaıdy «Anadolý» agenttigi.
Málimdemede Iran kelissózder barysynda qol jetkizilgen ýaǵdalastyqqa sáıkes izgi nıet belgisi retinde shekteýli sandaǵy azamattyq kemelerdiń baqylaýmen ótýine ruqsat bergeni atap ótilgen. Alaıda ırandyq áskerılerdiń aıtýynsha, AQSh «burynǵy kezeńderdegideı» óz mindettemelerin oryndamaı, teńiz blokadasyn jalǵastyrǵan.
Osyǵan baılanysty Ormýz buǵazynyń qaıtadan jabylǵany jáne onyń Iran Qarýly kúshteriniń qatań baqylaýynda bolatyny jarııa etildi.
– Ormýz buǵazyna qatań baqylaý AQSh Iranǵa jáne Irannan qatynaıtyn kemelerdiń erkin qozǵalysyna ruqsat bergenge deıin júzege asyrylady, – dep atap ótti shtabta.
Iran sondaı-aq AQSh tarapynan qoıylǵan «shekten tys talaptarǵa» baılanysty kelissózderdiń kelesi kezeńine qatysýǵa ázirge kelisken joq jáne óz ustanymyn kelissózderde deldal bolyp otyrǵan Pákistan arqyly amerıkalyq tarapqa jetkizdi.
Irannyń Tasnim agenttigi derekkózderge silteme jasap habarlaǵandaı, Tegerannyń bul sheshimi AQSh prezıdenti Donald Tramp jarııalaǵan Iranǵa qarsy «teńiz blokadasyna», sondaı-aq kelissózder barysynda amerıkalyq taraptyń «shekten tys talaptaryna» baılanysty.
Atap ótilgendeı, kelissózderdiń jalǵasýy AQSh-tyń osy talaptardan bas tartýyna táýeldi, al Iran «qajytatyn ári nátıjesiz» konsýltatsııalarǵa qatysýǵa nıetti emes. Bul ustanym amerıkalyq ókilderge Pákistan arqyly jetkizilgeni habarlandy.
28 aqpanda AQSh pen Izraıldiń Iranǵa jasaǵan shabýyldarynan bastalǵan soǵys aıasynda 8 sáýirde qol jetkizilgen ýaqytsha bitimnen keıin Tegeran men Vashıngton 11 sáýirde Pákistanda turaqty atysty toqtatýǵa qol jetkizý jóninde kelissózder ótkizdi. Shamamen 21 saǵatqa sozylǵan kelissózder nátıje bergen joq.
Irannyń resmı tulǵalary kelisimniń bolmaýyna AQSh tarapynan qoıylǵan «shekten tys talaptar» sebep bolǵanyn málimdedi.
Sonymen qatar Iran buǵan deıin Ormýz buǵazyn barlyq saýda kemeleriniń ótýi úshin ashqan bolatyn, alaıda AQSh Iranǵa qarsy «teńiz blokadasynyń» jalǵasatynyn málimdedi. Buǵan jaýap retinde Tegeran Ormýz buǵazy arqyly ótýge qaıtadan shekteý engizip, dálizdi jabatynyn málimdegen edi.