Iran Ormýz buǵazyn birlesip basqarý týraly Omannyń usynysyn qabyldamady
ASTANA. KAZINFORM – Iran Ormýz buǵazyn birlesip basqarý jónindegi Omannyń usynysyn qabyldamaı, keme qatynasyn uıymdastyrýdyń óz nusqasyn usyndy. Bul týraly Iran syrtqy ister mınıstriniń orynbasary Kazem Garıbabadı memlekettik telearna efırinde málimdedi, dep habarlaıdy Kazinform agenttiginiń menshikti tilshisi.
Onyń aıtýynsha, Maskat buǵazdaǵy tranzıttik baǵyttardy eki el arasynda teń bólýdi usynǵan. Alaıda Tegeran mundaı shema ulttyq qaýipsizdik múddelerine saı kelmeıdi dep esepteıdi.
Irannyń usynysyna sáıkes, keme qatynasy baǵyttarynyń biri tolyqtaı eldiń aýmaqtyq sýlary arqyly ótýi tıis. Al ekinshi baǵyttyń bir bóligi de Irannyń baqylaýynda bolýy qajet.
– Eger Oman Tegerannyń qarsy usynysyn qabyldamasa, Ormýz buǵazy jabyq kúıinde qalady, – dedi Kazem Garıbabadı.
Buǵan deıin Oman Ormýz buǵazyn Malakka buǵazy úlgisi boıynsha birlesip basqarýdyń óńirlik tetigin qurýdy usynǵan bolatyn. Bastama keme qatynasyn birlesip basqarýdy, sondaı-aq navıgatsııa qaýipsizdigin qamtamasyz etýge, qorshaǵan ortany qorǵaýǵa jáne izdestirý-qutqarý jumystaryna keme qatynasy kompanııalarynyń erikti jarna tóleý júıesin qarastyrady. Bul usynysty Parsy shyǵanaǵy elderi qoldaǵany habarlanǵan.
Ormýz buǵazy – álemdik energetıkalyq resýrstar saýdasyndaǵy eń mańyzdy teńiz baǵyttarynyń biri. Qaqtyǵys bastalǵanǵa deıin álemdik munaı men suıytylǵan tabıǵı gaz jetkiziliminiń shamamen besten biri osy buǵaz arqyly tasymaldanǵan.
