Iran Ormýz buǵazyn basqarýǵa arnalǵan jańa organnyń qurylatynyn jarııalady
ASTANA. KAZINFORM – Tegeran AQSh pen Izraılmen qaqtyǵys kezinde keme qatynasyn baqylaý mehanızmin qalyptastyrýdy jalǵastyryp otyr, dep habarlaıdy Kazinform-nyń Taıaý Shyǵystaǵy menshikti tilshisi.
Irannyń Joǵarǵy Ulttyq qaýipsizdik keńesi dúısenbi kúni jańa organ – Parsy shyǵanaǵy jáne Ormýz buǵazynda keme qatynasy jónindegi basqarmanyń (Persian Gulf Strait Authority, PGSA) qurylatynyn jarııalady.
X áleýmettik jelisinde jarııalanǵan habarlamada jańa qurylym «Ormýz buǵazyndaǵy operatsııalar jáne sońǵy oqıǵalar týraly jedel jańalyqtardy» usynatyny aıtylǵan.
Iran Islam revolıýtsııasy saqshylar korpýsynyń Áskerı-teńiz kúshteri de osyndaı habarlama jarııalady.
Jańa organnyń qurylymy, ókilettikteri jáne jumys tetikteri týraly ázirge egjeı-tegjeıli aqparat jarııalanǵan joq.
Jańa organnyń qurylýy álemdik munaı men gaz jetkizilimderiniń aıtarlyqtaı bóligi ótetin Ormýz buǵazy tóńiregindegi daǵdarystyń jalǵasýymen baılanysty.
Buǵan deıin Iran parlamentiniń Ulttyq qaýipsizdik jáne syrtqy saıasat jónindegi komıtetiniń basshysy Ibrahım Azızı Tegeran Ormýz buǵazy arqyly belgilengen baǵyt boıynsha keme qatynasyn retteý mehanızmin ázirlegenin málimdegen bolatyn.
Onyń aıtýynsha, Iran jańa júıe aıasynda kórsetiletin «mamandandyrylǵan qyzmetter» úshin aqy alýdy kózdep otyr.
- Bul mehanızmdi tek Iranmen yntymaqtastyq jasaıtyn kommertsııalyq kemeler men taraptar ǵana paıdalana alady, - dedi Azızı.
28 aqpanda AQSh pen Izraıldiń Iranǵa shabýyldary bastalǵaly Tegeran Ormýz buǵazy arqyly qozǵalysty shektedi, al 13 sáýirden bastap AQSh Irannyń teńiz trafıgine qarsy áskerı-teńiz blokadasyn engizdi.
8 sáýirde Pákistannyń deldaldyǵymen jasalǵan atysty toqtatý jónindegi kelissózder ázirge qaqtyǵystyń uzaq merzimge toqtata almady.
Bir kún buryn Iran Syrtqy ister mınıstrliginiń ókili Esmaıl Bagaı Iran men Omannyń tehnıkalyq toptary Omanda Ormýz buǵazy arqyly qaýipsiz tranzıt mehanızmin qurý máselesi boıynsha kelissóz júrgizgenin habarlady.
Onyń aıtýynsha, taraptar halyqaralyq quqyqqa sáıkes negiz qurýdy talqylady, al Tegeran men Maskat arasyndaǵy saraptamalyq konsýltatsııalar kelesi aptada jalǵasady.
Eske salsaq, Iran Tramptyń qoqan-loqysyna qaramastan AQSh-pen kelissózdi jalǵastyratynyn málimdedi.
AQSh Iranǵa ıadrolyq kelissózderdi qaıta bastaý úshin birneshe shart qoıdy.
Sondaı-aq Qazaqstan Iranǵa 30 vagon gýmanıtarlyq kómek jóneltkenin habarladyq.
