Iran Ormýz buǵazyn ashýdyń shartyn atady
ASTANA. KAZINFORM — Iran AQSh tarapynan blokada men shabýyldar toqtaǵan jaǵdaıda Ormýz buǵazyn ashýǵa daıyn. Bul týraly Iran prezıdenti Masýd Pezeshkıan málimdedi, dep habarlaıdy Anadolu.
Úndistannyń India Today telearnasyna bergen suhbatynda Masýd Pezeshkıan AQSh áskerı jolmen óz maqsatyna jete almaǵan soń ekonomıkalyq qysymǵa kóshkenin aıtty.
— Olar soǵys arqyly óz maqsattaryna jete almady. Sondyqtan ekonomıkalyq qysymǵa kóshti. Alaıda biz toqtamaımyz, — dedi ol.
Iran prezıdenti teńiz blokadasy arqyly da AQSh óz maqsatyna jete almaıtynyna senim bildirdi.
— Árıne, teńiz joly — bizdiń ómirimiz táýeldi jalǵyz baǵyt emes. Bul jolmen de olar óz maqsattaryna jete almaıdy, — dedi Pezeshkıan.
Ol AQSh tarapynan blokada men shabýyldar toqtaǵan jaǵdaıda Ormýz buǵazy ashylatynyn atap ótti.
Pezeshkıan sondaı-aq Ormýz buǵazyndaǵy jaǵdaıǵa baılanysty Iran men Oman arasyndaǵy kelissózder týraly aıtty. Onyń sózinshe, dúısenbi kúni Maskatta arab elderiniń syrtqy ister mınıstrleri kezdesedi.
— Osy aptadaǵy dúısenbide arab elderiniń syrtqy ister mınıstrleri Maskatta jınalyp, Oman men Irannyń Ormýz buǵazy arqyly birlesken baǵyt qurý týraly kelisimine qol qoıady jáne bul kelisim týraly Halyqaralyq teńiz uıymyna habarlaıdy. Kezdesýge bizge shabýyl jasalǵan aýmaqtan [AQSh] elderi de qatysady, — dedi ol.
Buǵan deıin Tegeran Ormýz buǵazy arqyly teńiz qatynasynyń jańa tártibin qalyptastyryp jatqany habarlanǵan bolatyn.
Sonymen qatar AQSh prezıdenti Ormýz buǵazyn «Tramp buǵazy» dep qaıta ataýdy usyndy.
