Iran Ormýz buǵazyn ashýdyń shartyn atady
ASTANA. KAZINFORM – Iran Islam revolıýtsııasy saqshylar korpýsynyń ókili, brıgada generaly Hoseın Mohebbı Ormýz buǵazy arqyly keme qatynasy AQSh Irannyń talaptaryn qabyldaǵan jaǵdaıda qaıta jandanatynyn málimdedi, dep habarlaıdy Anadolu.
Irannyń Tasnim aqparat agenttiginiń málimetinshe, Hoseın Mohebbı bul týraly Hormozgan provıntsııasynda Jýrnalıster kúnine arnalǵan is-shara barysynda aıtqan.
Onyń sózinshe, Ormýz buǵazy Iran úshin tek ekonomıkalyq mańyzy bar sý joly ǵana emes, eldiń geografııalyq jáne strategııalyq qýatynyń negizgi elementteriniń biri sanalady.
– Ormýz buǵazynyń jumysyn qaıta bastaý Iran belgilegen tetikter men sharttarǵa baılanysty. Bul Iran men Oman arasyndaǵy kelissózderge qatysy joq, – dedi Hoseın Mohebbı.
Ol buǵazdyń ashylýy AQSh-tyń Iran talaptaryn qabyldaýyna jáne Vashıngtonnyń óńirlik kelissózderge aralasýdan bas tartýyna baılanysty ekenin atap ótti.
– Eger AQSh Irannyń sharttaryn qabyldasa, Ormýz buǵazy mindetti túrde ashylady, – dedi ol.
Buǵan deıin Iran men Omannyń Ormýz buǵazyna qatysty kelisimge jaqyndaǵany habarlanǵan.
