Iran Ormýz buǵazyn ashý týraly usynysqa AQSh-tyń jaýabyn kútip otyr
ASTANA. KAZINFORM — Qatar keme qatynasyn qalpyna keltirý boıynsha Tegeran men Vashıngton arasyndaǵy kelissózderge araaǵaıyn bolyp otyr, dep habarlaıdy Kazinform agenttiginiń menshikti tilshisi.
Irannyń syrtqy ister mınıstri Abbas Aragchı 28 qyrkúıek kúni keshke Nıý-Iorkte Ormýz buǵazyn ashý týraly usynysqa AQSh seısenbiden qalmaı resmı jaýap beredi dep úmit artatynyn málimdedi. Bul týraly Irannyń memlekettik IRNA aqparat agenttigi habarlady.
Aragchıdiń aıtýynsha, Qatar ókilderi Tegerannyń sharttaryn oryndaýdyń yqtımal joldaryn Iran tarapymen talqylaǵan. Endi olar bul ıdeıalardy Vashıngtonǵa taǵy da usynyp, sodan keıin AQSh jaýabyn Iranǵa jetkizýdi kózdep otyr.
— Ony erteń alamyz dep úmittenemin, - dedi mınıstr dúısenbi keshinde.
Ótken aptada Iran buǵazdy ashýdy jáne jeti kún ishinde ıadrolyq kelissózderdi qaıta bastaýdy usynǵan bolatyn. Jospar talaptarynyń qatarynda jeti kún ishinde barlyq baǵyttaǵy, sonyń ishinde Lıvandaǵy áskerı is-qımyldardy toqtatý bar. Sondaı-aq Iran AQSh-tan buǵattalǵan qarjy aktıvterin bosatýdy, Iran munaıyna qatysty sanktsııalardy alyp tastaýdy jáne teńiz blokadasyn toqtatýdy talap etip otyr.
Senbi kúni AQSh prezıdenti Donald Tramp Irannyń usynysynan bas tartatynyn málimdedi. Alaıda Aragchıdiń aıtýynsha, Tegeran áli deldaldar arqyly AQSh-tyń resmı jaýabyn alǵan joq. Jeksenbi kúni Tramp Iranmen kelissózderdi osy aptada jalǵastyrýǵa ruqsat berdi.
Taraptar yqtımal kelisim neni qamtýy kerektigi boıynsha da ymyraǵa kele almaı otyr.
Iran buǵazdyń ashylýyn óz porttarynan blokadanyń alynyp tastalýymen jáne basqa da sharttardyń oryndalýymen baılanystyrady. AQSh Irannan ıadrolyq baǵdarlama boıynsha óz talaptaryna kóngenin kútip otyr.
Dúısenbide Tramp Tegeran bul talaptarǵa kónýi úshin sanktsııalardy jeńildetýdi jáne muzdatylǵan qarajatty bosatýdy usynǵany týraly aqparatty joqqa shyǵardy.
Keshe Aragchı Tegeran kelissózderge de, AQSh-pen jańa qaqtyǵysqa da daıyn ekenin málimdegen.
Sondaı-aq 28 qyrkúıekte AQSh-Iran kelissózderiniń jańa kezeńi ótetini týraly habarlandy.
