Iran Ormýz buǵazyn ashpaıdy — jańa Joǵarǵy kóshbasshynyń málimdemesi

ASTANA. KAZINFORM — Irannyń jańa Joǵarǵy kóshbasshysy Modjtaba Hameneı taǵaıyndalǵannan keıingi alǵashqy málimdemesinde Ormýz buǵazy jabyq kúıinde qalatynyn aıtty, dep habarlaıdy Al Jazeera telearnasy.

Ol sondaı-aq aımaqtaǵy barlyq amerıkalyq áskerı bazalar dereý jabylýy tıis ekenin, áıtpese olarǵa shabýyl jasalatynyn málimdedi. Irannyń Joǵarǵy kóshbasshysy Islam Respýblıkasy AQSh bazalaryna qarsy shabýyldaryn jalǵastyratynyn atap ótti. Sonymen qatar, Iran qarsy turýdy jalǵastyratynyn aıtyp, halyqty ulttyq birlikke shaqyrdy.

Joǵarǵy kóshbasshy Iran aımaqta ústemdik pen otarshyldyqtyń ornaýyn qalamaıtynyn, barlyq kórshi eldermen birlikke jáne jyly, shynaıy qarym-qatynas ornatýǵa daıyn ekenin aıtty, dep habarlaıdy Fars agenttigi. Modjtaba Hameneı sondaı-aq Iranǵa jasalǵan shabýyldar úshin ótemaqy talap etiletinin qosty.

Eske sala keteıik, Taıaý Shyǵystaǵy qaqtyǵys saldarynan Ormýz buǵazy jabylǵanyn jazǵan edik. Qazir munda munaı-gaz tasymaldaıtyn 150-den astam keme keptelip tur. Iran buǵazdy buǵattaý arqyly AQSh-tyń meselin qaıtarǵysy kelgenimen, álem elderine shıkizat tasymalynyń tejelgeni ońaıǵa soqpaı otyr.

Al artynsha Kpler teńiz analıtıkalyq kompanııasynyń derekterine sáıkes, Ormýz buǵazy arqyly tankerler tasymaly ótken aptamen salystyrǵanda shamamen 90%-ǵa azaıǵany habarlandy.