Iran Ormýz buǵazy túbindegi ınternet kabelderi úshin aqy engizbek
ASTANA. KAZINFORM - Iran Ormýz buǵazy arqyly tartylǵan talshyqty-optıkalyq kabelderdi paıdalanǵany úshin tólem engizýdi josparlap otyr, dep habarlaıdy BILD.
Sońǵy birneshe aptada Iran álemdegi eń mańyzdy saýda baǵyttarynyń biri sanalatyn Ormýz buǵazy arqyly qozǵalysty shektegen.
Qazir bul aımaqtan tek az ǵana munaı tankerleri ótip jatyr.
Endi Tegeran buǵaz túbimen ótetin ınternet kabelderinen de tabys tappaq.
Áńgime halyqaralyq derekterdi tasymaldaıtyn úsh iri baılanys jelisi týraly bolyp otyr.
Olar arqyly kún saıyn shamamen 10 mıllıard dollarlyq qarjylyq operatsııalarǵa qatysty aqparat ótedi.
Tegeran jańa alym arqyly munaı eksportynan túsip jatqan shyǵynnyń ornyn toltyrýdy kózdeıdi.
Iran bıliginiń málimetinshe, bul shyǵyn kólemi kúnine 220 mıllıon dollarǵa deıin jetken.
Mundaı shyǵyn AQSh áskerı-teńiz kúshteri Iran porttaryn buǵattaǵannan keıin paıda bolǵan.
— Irandyq BAQ-tyń jazýynsha, Tegeran kabelderdi paıdalanatyn sheteldik kompanııalardy jyl saıyn lıtsenzııalyq tólem tóleýge mindetteýi múmkin. Óıtkeni bul jospar tek ekonomıkalyq emes, saıası saldarǵa da ıe bolýy yqtımal. Meta, Amazon jáne Microsoft sekildi amerıkalyq tehnologııalyq alpaýyttar Ormýz arqyly ótetin kabelderdi paıdalansa, «Iran zańymen» jumys isteýge májbúr bolady. Bul tsenzýra talaptaryn da qamtıdy, — delingen jarııalanymda.
Buǵan deıin Ibrahım Rezaı AQSh pen Izraıl tarapynan jańa shabýyl jasalsa, Tegeran ýrandy baıytý deńgeıin 90 paıyzǵa deıin kóterýi múmkin ekenin aıtqan.
Ol Iran parlamentiniń syrtqy saıasat jáne ulttyq qaýipsizdik komıtetiniń ókili.
Osyǵan deıin Eýroodaqtyń AQSh-Iran qaqtyǵysyna baılanysty energııaǵa 27 mlrd eýro artyq tólegeni týraly jazdyq.
