Iran Ormýz buǵazy mańynda arnaıy baqylaý aımaǵyn qurady
ASTANA. KAZINFORM — Tegeran Ormýz buǵazy arqyly keme qatynasyna arnalǵan jańa erejelerdi ázirleýdi jalǵastyryp jatyr, dep habarlaıdy Kazinform-nyń menshikti tilshisi.
Iran aldaǵy kúnderi Parsy shyǵanaǵy men Oman teńizinde jańa shekteýli kirý aımaǵyn jarııalaıdy. Bul týraly Iran Joǵarǵy Ulttyq qaýipsizdik keńesiniń hatshysy Mohsen Rezaı jeksenbi kúni memlekettik IRIB telearnasynda málimdedi.
Onyń aıtýynsha, aımaq AQSh engizgen áskerı-teńiz blokadasynyń shebi men Irannyń júk tıeý porttary arasyndaǵy aýmaqty qamtıdy. Tegerannyń kelisiminsiz Ormýz buǵazyna baratyn kemeler Irannyń sanktsııalar tizimine qosylady.
Rezaı mundaı kemeler saqtandyrý jáne keıinnen buǵaz arqyly ótý máselelerine tap bolýy múmkin ekenin málimdedi.
— Irannyń kelisiminsiz osy aımaqta jumys isteıtin kez kelgen keme sanktsııalar tizimine engiziledi, — deıdi Mohsen Rezaı.
Iran men Oman eki elge tıesili sý joldary arqyly jańa halyqaralyq keme dálizin ashýǵa kelisti. Rezaıdiń aıtýynsha, baǵdardy Tegerannyń basqarady, al kelisimge aldaǵy kúnderi qol qoıylyp, jarııalanady dep josparlanyp otyr.
Rezaı buǵazdyń tolyǵymen jabyq ekenin málimdep, AQSh-tyń keme qatynasyn qalpyna keltirý týraly málimdemelerin «jalǵan aqparat» dep atady. Ol qazirgi ýaqytta Iran úshin mańyzdy taýarlardy tasymaldaıtyn jeti-segiz keme ǵana ótip jatqanyn atap ótti.
— Biz Ormýz buǵazyn amerıkalyqtar Iranǵa qarsy dıversııalaryn, qoqan-loqqysyn jáne shabýyldaryn toqtatqannan keıin ǵana ashamyz, — dep atap ótti Rezaı.
Reuters agenttiginiń málimeti boıynsha, keıingi on kúnde buǵaz arqyly kúnine orta eseppen onǵa jýyq saýda kemeleri ótken, bul mamyr aıynan bergi eń tómengi deńgeı. Keme qatynasyna qoıylǵan shekteýler jáne AQSh-Iran áýe shabýyldarynyń qaıta bastalýy munaı baǵasynyń ósýine ákep soqtyrdy, atap aıtqanda, 1 barrel Brent markaly shıki munaı baǵasy 97 dollardan asyp tústi.
Eske sala keteıik, buǵan deıin AQSh Qarýly kúshteri Irannyń teńiz blokadasy aıasynda 92 saýda kemesiniń baǵyty ózgergenin habarlaǵan edik.
Nurlan Tuıaqov
