Iran Omanmen Ormýz buǵazyn basqarýdyń jańa tásili jóninde kelissóz júrgizip jatyr
ASTANA. KAZINFORM — Iran Ulttyq qaýipsizdik joǵary keńesi tóraǵasynyń orynbasary Álı Bagerı Tegerannyń Oman elimen Ormýz buǵazyndaǵy teńiz qatynasyn retteýdiń jańa tetigin ázirleý boıynsha kelissóz júrgizip jatqanyn málimdedi. Bul týraly Anadolu agenttigi habarlady.
Máskeýde ótip jatqan qaýipsizdik organdarynyń joǵary laýazymdy ókilderiniń XIV halyqaralyq konferentsııasyna qatysqan Álı Bagerı jýrnalısterge suhbat berdi.
Onyń aıtýynsha, Ormýz buǵazy máselesine qatysty ázirge Amerıka Qurama Shtattary men naqty kelisimge qol jetkizilmegen.
— Iran men Oman — Ormýz buǵazy jaǵalaýyndaǵy kórshiles memleketter. Qazir eki el buǵaz arqyly ótýdi retteıtin jańa tetik qalyptastyrý jóninde kelissóz júrgizip jatyr. Iranǵa qarsy soǵys bastalǵanǵa deıin qoldanylǵan erejeler endi ózgeshe bolady, — dedi ol.
Sondaı-aq Bagerı AQSh-pen janama kelissózder jalǵasyp jatqanyn aıtty. Onyń sózinshe, Irannyń baıytylǵan ýran qorynyń bolashaǵy ázirge kelissóz kún tártibine engizilmegen.
— Barlyq másele boıynsha ortaq kelisim jasalmaıynsha, eshbir baǵytta túpkilikti kelisimge qol jetkizildi dep eseptemeımiz, — dedi Iran ókili.
Buǵan deıin Iran Ormýz buǵazy arqyly ótetin kemelerden navıgatsııalyq alym alynatynyn málimdegen bolatyn.
