Ormýz buǵazy arqyly álemdik munaı saýdasynyń shamamen 20%-y ótedi

ASTANA. KAZINFORM — Iran Ormýz buǵazy arqyly ótetin tranzıtten alǵashqy tabys túskenin málimdedi. Bul týraly el parlamenti tóraǵasynyń orynbasary Hamıd Reza Hadjıbabaı habarlady, dep jazdy Anadoly.

Onyń aıtýynsha, buǵaz arqyly ótetin kemelerden alynatyn tranzıttik tólemderden túsken alǵashqy qarajat Irannyń Ortalyq bankiniń shotyna aýdarylǵan. Aqparatty jartylaı resmı Tasnim News Agency agenttigi taratty.

Hadjıbabaı AQSh tarapynan qysym men qaýip-qater saıasaty jalǵasatyn bolsa, Ormýz buǵazynyń tolyq ashylmaýy múmkin ekenin aıtty. Ol Irannyń ustanymy «kelissóz emes, óz quqyǵyn talap etý» ekenin atap ótti.

— Iran halqynyń talaby — Ormýz buǵazy Iranǵa tıesili bolýy kerek, al odan ótetin barlyq kemeler ulttyq valıýta — rıalmen salyq tóleýi tıis, — dedi ol.

Sheneýnik buǵazdyń strategııalyq mańyzyn da eske saldy. Onyń aıtýynsha, Ormýz arqyly álemdik munaı saýdasynyń shamamen 20%-y jáne tabıǵı gazdyń 35%-y ótedi. Sondyqtan bul aımaqty baqylaý Irannyń halyqaralyq ekonomıkadaǵy rólin kúsheıtedi.

Hadjıbabaı tranzıttik tólemderden alǵashqy tabystar túskenin rastaǵanymen, naqty qandaı kemelerden jáne qandaı merzimde alynǵany týraly aqparat bermedi.

Buǵan deıin AQSh pen Izraıldiń Iranǵa jasaǵan soqqylarynan keıin bastalǵan shıelenis kezinde Ormýz buǵazy ýaqytsha jabylǵany habarlanǵan bolatyn.

Sonymen qatar, Iran parlamenti buǵaz arqyly ótetin kemelerden aqy alý týraly zań jobasyn ázirlep jatyr. Jobaǵa sáıkes, tólemder ıran rıalymen belgilenýi múmkin.

Aıta keteıik, buǵan deıin Iran Ormýz buǵazy arqyly tranzıt úshin esep aıyrysýdy rıalmen júrgizýdi usyndy.