Iran Ormýz buǵazy arqyly tranzıt úshin esep aıyrysýdy rıalmen júrgizýdi usyndy
ASTANA. KAZINFORM – Iran bıligi Ormýz buǵazy arqyly ótetin kemeler úshin tólemderdi ulttyq valıýta – rıalmen júrgizý bastamasyn usyndy, dep habarlaıdy Kazinform tilshisi.
Iran parlamenti tóralqasynyń múshesi Ahmad Naderıdiń aıtýynsha, bul jospar aımaqta ulttyq valıýtanyń rólin kúsheıtýge jáne mańyzdy teńiz dálizindegi retteýdi júıeleýge baǵyttalǵan.
– Iran Ormýz buǵazynda kedergi keltirýshi nemese qysym kórsetýshi tarap emes, retteýshi ról atqarýǵa umtylady. Sondyqtan tranzıttik tólemderdi ulttyq valıýtada júrgizý arqyly saýda qatynastaryn júıeleýdi kózdeımiz, – dedi Ahmad Naderı.
Onyń sózinshe, sheteldik kemeler tólemderdi Irandaǵy ókildikteri nemese óńirdegi bank júıesi arqyly júzege asyra alady. Bul óz kezeginde rıaldyń pozıtsııasyn nyǵaıtýǵa múmkindik beredi.
– Ormýz buǵazyndaǵy teńiz trafıgin basqarý men retteýden túsetin tabys jylyna 10-15 mlrd dollar aralyǵynda bolýy múmkin. Degenmen bul kórsetkishterdi asyra baǵalamaý qajet, – dep atap ótti ol.
Bul bastama aımaqtaǵy geosaıası shıelenis pen AQSh engizgen áskerı-teńiz blokadasy aıasynda qarastyrylyp otyr. Qaqtyǵys bastalǵaly beri buǵaz arqyly keme qatynasynda irkilister baıqalyp, tasymal men saqtandyrý quny artqan.
Al, Ormýz buǵazy arqyly beıbit kezeńde álemdik munaı jetkizilimderiniń shamamen 20%-y ótedi.
Aıta keteıik, Ormýz buǵazynda AQSh blokadasyna qaramastan keme qatynasy jalǵasyp jatqany habarlandy.
