Iran Ormýz buǵazy arqyly keme qatynasy úshin aqy alatynyn jarııalady
ASTANA. KAZINFORM – Iran buǵaz arqyly keme qatynasy boıynsha daýlar jalǵasýy aıasynda navıgatsııalyq qyzmetter úshin úshin aqy alynatynyn málimdedi, dep habarlaıdy Kazinform agenttiginiń menshikti tilshisi.
Iran Syrtqy ister mınıstrliginiń ókili Esmaıl Bagaı dúısenbi kúni Tegeran Ormýz buǵazy arqyly ótetin kemelerden «navıgatsııalyq qyzmetter» úshin aqy alyp jatqanyn, alaıda muny ótý úshin aqy dep qarastyrmaıtynyn málimdedi.
- Ormýz buǵazy, Parsy shyǵanaǵy jáne Oman teńizinde navıgatsııalyq kómek jáne qorshaǵan ortany qorǵaý sharalaryn qosa alǵanda kórsetiletin qyzmetter belgili bir alym jınaýdy talap etedi, - dedi Bagaı apta saıynǵy brıfıngte.
Onyń aıtýynsha, Iran «alymdar alýǵa tyryspaıdy», al buǵazdy basqarý máselesi jaǵalaýdaǵy memleketterdiń quzyrynda. Bagaı sonymen qatar kemelerdiń Iran men Oman Ormýz buǵazy arqyly qaýipsiz ótýi úshin hattama boıynsha jumys istep jatqanyn jáne tıisti tetikti qurý boıynsha konsýltatsııalar júrgizip jatqanyn habarlady.
Iran SІM ókiliniń atap ótýinshe, Tegeran men Maskat buǵazdy erkin saýda jáne qaýipsiz keme qatynasy úshin paıdalanýdy qoldaıdy. Bul rette akvatorııany baqylaýdy kúsheıtýdiń sebebi «buǵazdy Iranǵa qarsy áskerı agressııa úshin paıdalaný» boldy.
Tegerannyń málimdemeleri Parsy shyǵanaǵy men Ormýz buǵazy keme qatynasy basqarmasy (PGSA) BAÁ men Oman talap etetin sýlardyń bir bóligin qamtıtyn retteýshi aımaqtyń kartasyn jarııalaǵannan keıin birneshe kún ótken soń jasaldy. Jarııalanǵan erejelerge sáıkes, Iran belgilegen aımaq arqyly tranzıtpen ótetin kemeler aldyn ala ruqsat alýy tıis.
Jaýap retinde Bahreın, Kýveıt, Qatar, Saýd Arabııasy jáne BAÁ Halyqaralyq teńiz uıymyna birlesken hat joldap, keme kompanııalaryn PGSA-men baılanys ornatpaýǵa jáne Iran usynǵan baǵyttardy paıdalanbaýǵa shaqyrdy.
Ormýz buǵazy álemdegi eń mańyzdy energııa resýrstaryn jetkizý joldarynyń biri bolyp qalyp otyr —qalypty jaǵdaıda ol arqyly álemdik munaı men gaz saýdasynyń shamamen besten bir bóligi ótedi.
Osyǵan deıin Iran Ormýz buǵazyn basqarýǵa arnalǵan jańa organnyń qurylatynyn jarııalady.
