Iran Ormýz buǵazy arqyly AQSh esmınetsteriniń ótkenin joqqa shyǵardy
ASTANA. KAZINFORM — Iran AQSh áskerı kúshteriniń eki amerıkalyq áskerı kemeniń Ormýz buǵazy arqyly ótkeni týraly málimdemesin joqqa shyǵardy. Bul týraly senbi, 11 sáýir kúni Iran Qarýly kúshteriniń «Hatam ál-Anbııa» ortalyq shtabynyń ókili Ebrahım Zolfagarı málimdedi, dep jazdy DW basylymy.
Onyń aıtýynsha, AQSh Qarýly kúshteri Ortalyq qolbasshylyǵynyń (CENTCOM) málimdemeleri úzildi-kesildi teriske shyǵarylady.
— Kez kelgen kemeniń ótýine qatysty sheshimdi Iran Islam Respýblıkasynyń qarýly kúshteri qabyldaıdy, — dep keltiredi Zolfagarıdiń sózin AFP agenttigi.
Buǵan deıin CENTCOM USS Frank E. Peterson (DDG 121) jáne USS Michael Murphy (DDG 112) esmınetsteri Ormýz buǵazy arqyly ótip, Parsy shyǵanaǵynda jumys istep jatqanyn habarlaǵan edi. Málimetke sáıkes, bul operatsııa Iran Islam revolıýtsııasy saqshylar korpýsy buryn ornalastyrǵan teńiz mınalaryn tazartý jónindegi keń aýqymdy mıssııa aıasynda júrgizilip jatyr.
CENTCOM qolbasshysy admıral Bred Kýperdiń aıtýynsha, jańa qaýipsiz teńiz dálizin qalyptastyrý úderisi bastalǵan.
— Búgin biz jańa ótkel jasaý protsesin bastadyq jáne jaqyn arada bul qaýipsiz baǵytty teńiz salasyna usynamyz, bul taýarlardyń erkin qozǵalysyna yqpal etedi, — dedi ol.
Onyń aıtýynsha, aldaǵy kúnderi mınadan tazartý jumystaryna AQSh-tyń qosymsha kúshteri, onyń ishinde sýasty drondary tartylady.
Buǵan deıin, 10 sáýirde The New York Times basylymy Irannyń Ormýz buǵazyna qoıylǵan barlyq mınalardy anyqtap, óz betinshe zalalsyzdandyrýǵa qaýqarsyz ekenin habarlaǵan. Basylym derekkózderiniń málimetinshe, bul Tegerannyń Tramp ákimshiliginiń buǵaz arqyly erkin ótýdi qamtamasyz etý talabyn jedel oryndaı almaýynyń basty sebepteriniń biri.
Málimetke sáıkes, Tegeran buǵazdy naýryz aıynda, AQSh pen Izraıldiń Iranǵa qarsy soǵysy bastalǵannan keıin kóp uzamaı shaǵyn katerler arqyly mınalaǵan. Mınalar, sondaı-aq ırandyq zymyran jáne dron soqqylary qaýpi munaı tankerleri men basqa da kemeler aǵynyn kúrt azaıtyp, álemdik energııa tasymaldaýshylar baǵasynyń ósýine áser etken.
Sonymen qatar The Financial Times basylymy 11 sáýirde AQSh pen Iran delegatsııalarynyń Pákistan astanasy Islamabadtaǵy kelissózderi Ormýz buǵazyn baqylaý máselesine baılanysty tyǵyryqqa tirelgenin habarlady.
Basylym deregine súıensek, Iran buǵazdy baqylaýda ustaýdy jáne odan ótetin kemelerden baj alýdy talap etip otyr. Sonymen birge Tegeran AQSh usynǵan «birlesken baqylaý» nusqalarynan bas tartqan.
Irannyń Fars memlekettik agenttigine sóılegen kelissóz tobyna jaqyn derekkóz Vashıngton talaptaryn «shekten tys» jáne «qabyldaýǵa kelmeıtin» dep ataǵan.
AQSh delegatsııasyn vıtse-prezıdent Djeıms Devıd Vens bastap barǵan. Onyń quramynda prezıdenttiń arnaıy ókili Stıven Ýıtkoff pen Donald Tramptyń kúıeý balasy Djared Kýshner de bar.
Iran delegatsııasyn parlament spıkeri Mohammad Bager Galıbaf pen syrtqy ister mınıstri Abbas Aragchı bastap otyr.
Aıta keteıik, buǵan deıin kelissózder 14 saǵatqa sozylyp, kelesi kezeńi 12 sáýirge josparlanǵanyn jazdyq.
