Iran orman órtin sóndirý úshin basqa elderden kómek surady
ASTANA. KAZINFORM — Irannyń soltústigindegi Hırkanı ormanynda birneshe kúnnen beri alapat órt bolyp jatyr. Iran úkimeti ózge elderden shuǵyl kómek surady, dep habarlaıdy Anadoly.
Qyzyl jalyn Mazendaran provıntsııasynyń Elıt taýly aımaǵynda qaıtadan kúsheıdi.
Jergilikti aqparat quraldarynyń habarlaýynsha, órt sóndirýshiler, qorshaǵan ortany qorǵaý qyzmetkerleri, «Besık» uıymynyń eriktileri jáne alpınıster jerdiń oıly-qyrlylyǵyna qaramastan, qıyn jaǵdaıda órtti sóndirýdi jalǵastyryp jatyr.
Qatty jel men bıik shóptiń kesirinen órt tez taralyp ketti. Aýmaqta tilsiz jaýdy sóndirý úshin sanaýly tikushaq bar. Sondyqtan eldiń vıtse-prezıdenti Mýhammad Djafar Kaımpenah órtti aýyzdyqtaýǵa múmkindik joq ekenin aıtyp, Iranǵa dos elderden kómek surady.
— Bizge orman órtin sóndirý úshin basqa elderden shuǵyl kómek qajet, — dedi ol.
Onyń aıtýynsha, alapat órtti baqylaýǵa alý jáne aınaladaǵy orman alqaptaryna taralmaýy úshin kómek surap otyr.
ıÝNESKO-nyń Búkilálemdik mura tizimine engizilgen Hırkanı ormandary sırek kezdesetin ósimdik túrlerimen jáne jabaıy tabıǵatymen tanymal. Ekologter órt uzaq ýaqyt boıy qorshaǵan ortaǵa zııanyn tıgizýi múmkin dep dabyl qaǵyp otyr.
Eske salaıyq, Iran bıligi qurǵaqshylyq jaǵdaıynda jańbyrdy jasandy túrde jaýdyra bastady.