Iran Ońtústik Parstaǵy búlingen óndiristik qýattyń 50 paıyzyn qalpyna keltirdi
ASTANA. KAZINFORM — Qys maýsymy qarsańynda Iran eldegi eń iri gaz ken ornynyń óndiristik ınfraqurylymyn qalpyna keltirýdi jedeldetip jatyr, dep habarlaıdy Kazinform agenttiginiń menshikti tilshisi.
22 qyrkúıektegi jaǵdaı boıynsha Iran Ońtústik Pars ken ornyndaǵy búlingen óndiristik qýattardyń shamamen 50 paıyzyn qalpyna keltirdi. Bul týraly Fars agenttigi Munaı mınıstriniń josparlaý máseleleri jónindegi orynbasary Ahmad Zeraatkarǵa silteme jasap habarlady.
— Ońtústik Parstyń óndiristik qýaty zaqymdanǵannan keıin olardy qalpyna keltirý baǵdarlamasy ázirlendi. Birqatar qondyrǵy josparlanǵan merzimnen buryn qaıta iske qosyldy, — dedi ol.
Iran restores half of damaged South Pars production capacity https://t.co/wnXSbc41Rm
— PressTV Extra (@PresstvExtra) September 23, 2026
Zeraatkardyń aıtýynsha, qalpyna keltirilgen nysandarda óndiris qaıta jandanyp, qalypty jumysqa kirisken. Al óndiristik qýattardyń ne sebepti búlingeni men keltirilgen zalaldyń jalpy kólemi ázirge naqtylanǵan joq.
Iranda qalpyna keltirý jumystaryn qarjylandyrý úshin ishki qarjy kózderi esebinen tórt joba ázirlendi. Bul qarajat búlingen nysandardy qalpyna keltirýge jumsalady.
Mınıstrdiń orynbasary osy kezeńge josparlanǵan jumystardyń tolyq oryndalǵanyn atap ótti. Qalǵan qalpyna keltirý jumystary qys maýsymy bastalǵanǵa deıin tolyǵymen aıaqtalmaq.
Zeraatkar sondaı-aq energetıkalyq júıege túsetin júktemeni azaıtý úshin turǵyndardy elektr energııasyn uqypty ári únemdi paıdalanýǵa shaqyrdy.
Ońtústik Pars — Parsy shyǵanaǵynda ornalasqan, Iran men Qatarǵa ortaq álemdegi eń iri tabıǵı gaz ken ornynyń Iranǵa tıesili bóligi.
Bul ken orny eldegi óndiriletin tabıǵı gazdyń edáýir bóligin qamtamasyz etedi.
Tamyz aıynda Iran Ońtústik Pars aımaǵynan tabıǵı gazdyń mol qoryn anyqtaǵanyn habarlaǵan edik.
