Iran Ońtústik Pars aımaǵynda tabıǵı gazdyń iri qoryn anyqtady
ASTANA. KAZINFORM — Irannyń munaı mınıstri Mohsen Paknejad eldiń ońtústigindegi Ońtústik Pars aımaǵynda 7,5 trıllıon tekshe fýttan astam tabıǵı gaz qory anyqtalǵanyn málimdedi, dep habarlaıdy Kazinform Anadolu agenttigine silteme jasap.
Iran memlekettik telearnasynyń efırinde sóz sóılegen Paknejad anyqtalǵan tabıǵı gaz kólemi shamamen 7,5 trıllıon tekshe fýt ekenin aıtty. Óndirý koeffıtsıenti 72 paıyzdan asatynyn eskersek, alynatyn gaz kólemi shamamen 5,7 trıllıon tekshe fýt bolýy múmkin.
Mınıstrdiń aıtýynsha, anyqtalǵan gaz kólemi Ońtústik Pars ken ornynyń bir fazasy 15 jyl ishinde óndire alatyn tabıǵı gaz mólsherine teń. Ol jańa qorlardyń Irannyń energetıkalyq resýrstaryna aıtarlyqtaı úles qosatynyn atap ótti.
Paknejad anyqtalǵan gazdyń «qurǵaq gaz» ekenin habarlady. Onyń aıtýynsha, mundaı gazdy tikeleı, qaıta óńdeýsiz nemese az mólsherde tazartqannan keıin tasymaldaýǵa bolady. Bul ken ornyn ıgerý jáne paıdalaný shyǵyndaryn azaıtýǵa múmkindik beredi.
Sonymen qatar mınıstr jańadan anyqtalǵan tabıǵı gazben birge gaz kondensatynyń da edáýir kólemi bar ekenin málimdedi. Onyń sózinshe, bul resýrstar gazdyń óz qunynan bólek, Iranǵa ondaǵan mıllıard dollar kóleminde jańa ekonomıkalyq qundylyq ákelýi múmkin.
Eske salaıyq, buǵan deıin Germanııada tótenshe jaǵdaılarǵa arnalǵan memlekettik gaz qory qurylatynyn habarlaǵanbyz.
