Iran Ońtústik Koreıanyń munaı tankerine jasalǵan shabýylǵa qatysy joq ekenin málimdedi
ASTANA.KAZINFORM - Iran Ormýz buǵazynda Ońtústik Koreıanyń munaı tankerine shabýyl jasady degen aqparatty resmı túrde joqqa shyǵardy, dep habarlaıdy Anadolu.
- Biz Iran Qarýly Kúshteriniń Ormýz buǵazyndaǵy Ońtústik Koreıa týy bar kemege zaqym keltirý oqıǵasyna qatysy bar degen kez kelgen aıyptaýlardy qatań túrde joqqa shyǵaramyz, - dep málimdedi Seýldegi Iran elshiligi.
Dıplomatııalyq mıssııa AQSh-tyń áreketterine baılanysty Ormýz buǵazyndaǵy teńiz qaýipsizdigin qamtamasyz etý sharttary ózgergenin atap ótti.
Osyǵan baılanysty aımaq arqyly ótetin barlyq kemeniń belgilengen erejelerdi saqtaýy jáne Iran bıligimen úılestire áreket etýi qajet ekeni ataldy.
Elshilik bul talaptardy oryndamaý jaýapkershilikke ákep soǵatynyn atap ótti.
4 mamyrda Ońtústik Koreıanyń «HMM Namu» júk kemesine Ormýz buǵazynda belgisiz zat arqyly soqqy jasaldy. Keıinnen shabýyldy osy strategııalyq mańyzdy sý jolyn basqaratyn Iran jasady degen aıyptaýlar paıda boldy.
Aıta keteıik, Iran AQSh-qa jańa kelisim jobasyn Pákistan arqyly joldady.
