Iran narazylyq kezinde shamamen 2000 adam qaza tapqanyn moıyndady
ASTANA. KAZINFORM — Iran bıligi jalǵasyp jatqan narazylyqtar aıasynda bolǵan adam shyǵynynyń kólemin alǵash ret jarııalady, dep habarlaıdy Kazinform agenttigi.
Irandaǵy narazylyqtar kezinde qaýipsizdik kúshterin qosa alǵanda, shamamen 2000 adam qaza tapty. Aty-jónin atamaýdy ótingen ırandyq sheneýnik seısenbi kúni Reuters agenttigine suhbat bergen.
— Bul úkimettiń Islam Respýblıkasynda eki apta boıy jalǵasyp jatqan jappaı búkilhalyqtyq narazylyqtar bastalǵannan bergi qurban bolǵandar sanyn alǵash ret moıyndaýy, — dedi ol.
Derekkózdiń málimetinshe, bılik narazylyq bildirýshilerdiń de, qaýipsizdik kúshteriniń de qazasyna «terrorıster» dep ataǵan adamdardy kinálap otyr.
Alaıda, qurban bolǵandar týraly naqty eshqandaı málimet berilgen joq.
Ekonomıkalyq jaǵdaıdyń kúrt nasharlaýynan týyndaǵan qazirgi narazylyqtar Irannyń dinı basshylyǵy úsh jyldaǵy eń kúrdeli ishki synaqqa aınaldy. Adam quqyqtary uıymdary buǵan deıin júzdegen adamnyń qazasy men myńdaǵan adamnyń tutqyndalǵany týraly habarlaǵan.
AQSh-ta ornalasqan HRANA adam quqyqtary uıymynyń málimeti boıynsha, dúısenbi kúni 10 700-den astam tutqyndaý faktisi tirkelgen, biraq bul sandar resmı túrde rastalǵan joq.
Osyǵan baılanysty Iran oppozıtsııalyq Iran International veb-saıty naqty qaza tapqandar sany 12 000-ǵa jetýi múmkin ekenin málimdedi.
At least 12,000 people were killed in the largest killing in Iran’s contemporary history, carried out largely over two consecutive nights on January 8 and 9, Iran International’s editorial board concluded, based on a review of sources and medical data.
— Iran International English (@IranIntl_En) January 13, 2026
Iran is under a… pic.twitter.com/Zet5I8RlmQ
Esepte bul sandar el ishindegi ártúrli kózderden, sonyń ishinde qaýipsizdik agenttikteri men medıtsınalyq mekemelerden alynǵan aqparatqa negizdelgeni aıtylǵan. Bul habarlamalardy resmı organdar rastaǵan joq jáne táýelsiz tekserý múmkin emes.
Iran bıligi buǵan deıin mundaı boljamdardy joqqa shyǵaryp, narazylyq aktsııalaryn syrtqy kúshter paıdalandy jáne uıymdasqan toptar zorlyq-zombylyq uıymdastyrdy dep málimdegen.
Esterińizge sala keteıik, dúısenbide AQSh prezıdenti Donald Tramp Iranmen yntymaqtasatyn elderge 25% baj salyǵyn engizetinin jarııalady.
Sondaı-aq, seısenbi kúni AQSh óz azamattaryn Irannan ketýge shaqyrdy.