Iran muraǵattarynda qazaqtyń jaýjúrek halyq ekeni týraly jazbalar saqtalǵan — Toqaev
ASTANA. KAZINFORM — Iran muraǵattarynda Qazaq handyǵy jáne qazaqtyń jaýjúrek halyq ekeni týraly jazbalar saqtalǵan. Bul týraly Aqordada Iran Islam Respýblıkasynyń Prezıdenti Masýd Pezeshkıanmen kelissózder qorytyndysyna oraı BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty.
— Iran halyqaralyq bedeli zor memleket ári bizdiń Orta shyǵystaǵy senimdi seriktesimiz. Baýyrlas qos halyqtyń tarıhy tamyrlas, salt-dástúri jáne mádenıeti uqsas. Qolymda birqatar tarıhı derekter bar eken. Mysaly, Uly jibek joly qazirgi Qazaqstan men Iran dalasy arqyly ótken. Uly jibek tehnologııanyń, dinniń taralýyna, sondaı-aq mádenı-rýhanı qatynastyń tereńdeýine yqpal etti, — dedi Prezıdent.
Memleket basshysy Qazaq hany Kereı Sefevı shahy Ismaılmen birinshi dıplomatııalyq qatynas ornatqanyn aıtty.
— Iran muraǵattarynda Qazaq handyǵy jáne qazaqtyń jaýjúrek halyq ekeni týraly jazbalar saqtalǵan. Táýke han men shah Sultan Hýseın arasynda tyǵyz qarym-qatynas ornaǵan. Eki el ókilderi Máskeýde kezdesip, Iran elshisi Qazaq dalasyna saparmen keldi degen tarıhı málimetter bar eken. Ábilhaıyr han Nádir shahqa elshi jiberip, baılanysty damytýǵa nıet bildirgen. Túrkistandaǵy Áziret sultan kesenesindegi taıqazan ıran sheberi Ábdel Azız Sharaf ad-Dın Termezdiń sheberhanasynda jasalǵan, — dedi Qasym-Jomart Toqaev.
Aıta keteıik, búgin Aqordada Memleket basshysy Qasym-Jomart Toqaev elimizge resmı saparmen kelgen Iran Islam Respýblıkasynyń Prezıdenti Masýd Pezeshkıandy qarsy aldy.
Toqaev Qazaqstan men Iran arasyndaǵy yntymaqtastyqtyń bolashaǵy óte zor ekenin aıtty.