Iran munaıdy dollarǵa satýdan bas tartty
ASTANA. QazAqparat - Iran munaı jetkizilimine jańadan qol qoıylǵan kelisimsharttar boıynsha esepti eýro valıýtasymen usynady, dep habarlady Reuters Irannyń ulttyq munaı kompanııasyndaǵy (NIOC) derekkózge silteme jasap. Onyń aıtýynsha, áńgime frantsýzdyń Total, ıspandyq Cepsa munaı-hımııa korporatsııasymen jáne Reseılik LÝKOIL-dyń treıdıngtik bólimshesi - Litasco kompanııasymen kelisimder jóninde bolyp otyr.
«Biz ózimizdiń eseptemelerimizge munaıymyzdy satyp alýshylardyń jetkizilim sátindegi dollardyń aıyrbas baǵamymen eýromen tóleýge týra keletin pýnktti engizemiz», - dedi agenttik suhbattasýshysy. .
Reuters LÝKOIL men Total túsindirme berýden bas tartqanyn, al Cepsa túsindirme týraly saýalǵa jaýap bermegenin atap ótedi.
Iran sondaı-aq óziniń áriptesterine oǵan tıesili mıllıardtaǵan dollardy amerıkandyq valıýtamen emes, eýromen alǵysy keletinin aıtty.
Agenttik suhbattasýshysy el sanktsııa jaǵdaıynda bolǵan kezde Irannyń Ortalyq banki sheteldik esep-qısapty eýromen júrgizý týraly sheshim qabyldaǵanyn aıtty. Derekkóz dollardan bas tartý saıası sebepterge baılanysty ekenin túsindirdi.
Iranǵa buryn amerıkandyq sanktsııalar nátıjesinde jabylǵan aktıvterdiń bir bóligin paıdalanýǵa ruqsat berilgen. Áńgime dollardaǵy emes, basqa valıýtalardaǵy, oman rıalyndaǵy jáne BAÁ dırhamyndaǵy qarajattar jóninde bolyp otyrǵanyn atap ótedi Reuters. Vashıngton jabylǵan aktıvterdiń jalpy somasyn 100 mlrd. dollarǵa (89,2 mlrd. eýro) baǵalap otyr, Tegeran sanktsııa alynyp tastalǵannan keıin shamamen jartysyn alýǵa qol jetkizdi.
Iran kóp jyldardan beri munaı saýdasynda halyqaralyq esep aıyrysýlarda dollardyń ornyna eýrony paıdalanýdy jaqtap keledi. 2007 jyly Tegeran OPEK boıynsha áriptesterin dollardan bas tartýǵa kóndirýge tyrysty, sol kezdegi Iran prezıdenti Mahmud Ahmadınejad dollardy «paıdasyz qaǵazdar» dep atady.
