Iran men túrki halyqtarynyń tarıhı baılanysy jaıly kitap oqyrmanǵa jol tartty
ASTANA. QazAqparat - Elordadaǵy «Kórme» ortalyǵynda «Oljas kitaphanasy» baspa úıi jaryqqa shyǵarǵan «Iran jáne Deshti Qypshaq halyqtarynyń rýhanı-tarıhı baılanysy» jınaǵynyń tusaýkeseri ótti, dep habarlaıdy QazAqparat tilshisi.
«Deshti Qypshaq degende biz HІ ǵasyrda Nasır Hýsravı «Deshti Qypshaq» dep atap ketken, asa úlken aýmaqty ıelengen túrki halyqtary týraly aıtamyz. Bul ataý georafııalyq jáne tarıhı turǵyda óte tanymal termın. Biz minekeı, segizinshi ret Qazaqstan Respýblıkasynyń Bilim jáne ǵylym mınıstrliginiń Shyǵystaný ınstıtýtymen birlese otyryp, Iran ǵylymı mekemesiniń kómegimen «Iran men Ortalyq Azııa halyqtarynyń rýhanı ári tarıhı baılanysy» atty halyqaralyq konferentsııa ótkizip otyrmyz. Konferentsııaǵa qazaqstandyq jáne ırandyq, Ortalyq Azııa jáne Reseıden kelgen ǵalymdar qatysýda. Bul orys tilinde shyǵyp otyrǵan kitaptyń sońǵy tomy. Oǵan belgili ǵalymdardyń, atap aıtqanda Sankt-Peterbýrgtegi Shyǵystaný ınstıtýtynyń akademıgi Alı Kolesnıkovtyń eńbegi engizilip otyr», - dedi qazaqstandyq shyǵystanýshy, ádebıetshi, jazýshy Sabır Abdýllo kitapty tanystyra otyryp.
Onyń aıtýynsha, Alı Kolesnıkovtyń VII ǵasyrda Ortalyq Azııa men Iranda ómir súrgen hrıstıandar týraly eńbegi jınaqty tolyqtyrǵan. Sonymen birge, kitapqa Lomonosov atyndaǵy Máskeý Memlekettik Ýnıversıtetiniń professory Rýstam Shýkýrovtyń jazǵan jazbalary, qazaqstandyq ǵalym Ádilet Kamalovtyń soǵdylar men túrkilerdiń baılanysy týraly eńbekteri kirgizilgen.
Sabır Abdýllo sonymen birge, tusaýkeser barysynda Tegeran ýnıversıtetiniń professory Ahmad Hatamıdiń fılologııa ǵylymdarynyń kandıdaty Aınash Seıtovanyń tárjimasyndaǵy «Qazirgi ıran ádebıeti» (qazaq tilinde) atty kitabyn tanystyrdy.
