Iran men Tájikstan strategııalyq áriptestikti tereńdetýge kelisti
ASTANA. KAZINFORM – Irannyń Syrtqy ister mınıstri Abbas Arakchı resmı saparmen Tájikstanǵa baryp, Prezıdent Emomalı Rahmonmen kezdesti.
Kezdesý barysynda taraptar eki el arasyndaǵy jan-jaqty yntymaqtastyqty nyǵaıtýǵa ózara múddelilik bildirdi. Arakchı Iran Islam revolıýtsııasynyń jetekshisi aıatolla Álı Hameneı men Prezıdent Masýd Pezeshkıannyń sálemin jetkizdi.
— Iran Islam Respýblıkasy til, tarıh jáne mádenıet ortaqtyǵyn ekijaqty qarym-qatynasty barlyq salada – dıplomatııadan bastap bilim berý men saýdaǵa deıin – damytý úshin paıdalanýǵa nıetti, — dedi Arakchı.
Emomalı Rahmon Dýshanbe men Tegeran arasyndaǵy baılanystardy erekshe dep atap, ekonomıkalyq jáne gýmanıtarlyq bastamalardy ilgeriletýdiń mańyzyn aıtty.
Ózara múddeli salalar men óńirlik kún tártibi
Taraptar energetıka, ónerkásip, aýyl sharýashylyǵy, densaýlyq saqtaý, týrızm, halyqaralyq tasymal, ǵylym jáne tehnologııa salalaryndaǵy seriktestikti basym baǵyttar retinde atady.
Buǵan qosa, joǵary deńgeıdegi burynǵy kelisimder aıasyndaǵy saýda-ekonomıkalyq jobalardyń júzege asyrylý barysy qaraldy.
Kezdesý aıasynda Ortalyq Azııa, Aýǵanstan, Kavkaz jáne Taıaý Shyǵystaǵy jaǵdaı boıynsha pikir almasyldy.
Sapar sheńberinde Iran men Tájikstan syrtqy ister mınıstrleri tóraǵalyǵymen eki el delegatsııalarynyń kelissózderi ótti.
Temirjol qatynasy keńeıedi
Sapar barysynda Irannyń Tájikstan jáne Túrikmenstanmen turaqty temirjol qatynasyn iske qosýǵa daıyndalyp jatqany belgili boldy.
Irannyń Ulttyq temirjol kompanııasy (RAJA) bas dırektory Jabbar Álı Zakerıdiń málimetinshe, Tegeran – Dýshanbe jáne Tegeran – Merv baǵyttary óńirlik logıstıkany damytý jáne kórshi eldermen saýda qatynasyn tereńdetý maqsatynda júzege asyrylady.
— Bul bastamalar júk jáne jolaýshylar tasymalyna, sondaı-aq týrızmge jańa múmkindikter ashady, — dedi ol.
Budan bólek, aldaǵy aılarda Tegeran – Ankara jáne Tegeran – Gerat (Aýǵanstan) baǵyttaryndaǵy poıyzdar iske qosylady. 2025 jyly Iran Qytaımen kelisim aıasynda 300 jańa jolaýshylar vagonyn qabyldaıdy.