Iran men Reseıden ákelingen 113 tonnadan astam ónim shekaradan kirgizilmedi
ASTANA. KAZINFORM – Iran men Reseıden Qazaqstanǵa ákelingen salat, arpa jáne qyzanaq partııalarynan qaýipti karantındik nysandar anyqtaldy. Fıtosanıtarııalyq baqylaý nátıjesinde 113 tonnadan astam zalaldanǵan ónimniń el aýmaǵyna ótkizilýine jol berilmedi, dep habarlaıdy Kazinform Aýyl sharýashylyǵy mınıstrligine silteme jasap.
QR AShM Agroónerkásiptik keshendegi memlekettik ınspektsııa komıtetiniń ınspektorlary memlekettik shekarada fıtosanıtarııalyq baqylaý júrgizý barysynda birqatar zań buzýshylyqty anyqtady.
Atap aıtqanda, Mańǵystaý oblysyndaǵy «Temir-Baba» avtomobıl ótkizý beketinde Irannan jetkizilgen salmaǵy 9,9 tonna «Aısberg» salaty partııasynan batys gúl trıpsi (Frankliniella occidentalis) anyqtaldy.
Atalǵan qaýipti karantındik zııankes Aqtóbe oblysyndaǵy «Jaısań» baqylaý beketinde de tabyldy. Reseıdiń Orynbor oblysynan jetkizilgen 0,7 tonna «Aısberg» salaty batys gúl trıpsimen zalaldanǵan.
– Sondaı-aq Reseıden ákelingen jalpy kólemi 100 tonna azyq-túlikke arnalǵan arpa ónimderinen aýyl sharýashylyǵy alqaptaryna qaýip tóndiretin karantındik aramshóp – jataǵan kekire (Acroptilon repens) anyqtaldy, – delingen mınıstrlik habarlamasynda.
Sonymen qatar Aqtóbe oblysynda salmaǵy 3 tonna qyzanaq partııasyn tekserý kezinde mamandar birden eki karantındik nysandy anyqtady. Olar – ońtústikamerıkalyq qyzanaq kúıesi (Tuta absoluta) jáne qyzanaq jemisiniń qońyr ájimdilik vırýsy (Tomato brown rugose fruit virus).
Anyqtalǵan karantındik nysandardyń barlyǵy «Fıtosanıtarııa» mekemesiniń tirkelgen zerthanalarynda júrgizilgen fıtosanıtarııalyq saraptama nátıjelerimen rastaldy.
Anyqtalǵan faktiler boıynsha ákimshilik quqyq buzýshylyq týraly hattamalar toltyrylyp, materıaldar sotqa joldandy jáne aıyppuldar salyndy.
QR AShM Agroónerkásiptik keshendegi memlekettik ınspektsııa komıteti karantınge jatqyzylǵan ónimderdiń ákelinýine qatysty kúsheıtilgen fıtosanıtarııalyq baqylaýdy jalǵastyryp jatyr.
Negizgi mindet – aýyl sharýashylyǵy daqyldaryna zııan keltirýi múmkin qaýipti karantındik nysandardyń el aýmaǵyna enýi men taralýyna jol bermeý jáne otandyq agroónerkásiptik keshendi qorǵaýdy qamtamasyz etý.
Aıta keteıik, shekara qyzmeti janar-jaǵarmaıdy zańsyz áketýdiń 411 deregin anyqtady.
