Iran men Oman Ormýz buǵazy boıynsha kelisimge kelýge jaqyndady
ASTANA. KAZINFORM – Iran men Oman Ormýz buǵazy arqyly keme qatynasynyń jańa baǵyty jóninde kelisimge kelýge jaqyn. Alaıda bul ýaǵdalastyq sý jolynyń birden ashylatynyn bildirmeıdi, dep habarlaıdy Reuters agenttigi.
Iran Syrtqy ister mınıstri Abbas Arakchıdiń aıtýynsha, taraptar tehnıkalyq jáne quqyqtyq máseleler tolyq sheshilgenge deıin paıdalanylatyn ýaqytsha baǵytty talqylap jatyr. Tegeran erkin keme qatynasyn qalpyna keltirýdi AQSh-tyń birqatar talapty oryndaýymen, sonyń ishinde ótemaqy tóleý, qoqan-loqyny toqtatý jáne sanktsııalardy alyp tastaýmen baılanystyryp otyr.
Oman Iranmen keme qatynasyn uıymdastyrý jónindegi kelissózderdi «oń ári syndarly» dep baǵalap, qol jetkizilgen ilgerileýge kedergi keltirýi múmkin áreketterge jol bermeýge shaqyrdy.
Sonymen qatar buǵazdaǵy kemelerdiń qaýipsizdigine qatysty jaǵdaı áli de kúrdeli. BAÁ bıligi Iran buǵaz arqyly ótip bara jatqan ADNOC memlekettik munaı kompanııasymen baılanysty kemege zymyranmen shabýyl jasaǵanyn málimdedi. Zardap shekkender týraly aqparat joq.
Ulybrıtanııanyń teńiz saýda operatsııalary basqarmasy (UKMTO) kemege belgisiz snarıad tıgennen keıin órt shyqqanyn rastady. Keıin órt sóndirilgen.
Irannyń Islam revolıýtsııasy saqshylar korpýsy Ormýz buǵazynyń ashylýy Omanmen júrgizilip jatqan kelissózderge emes, Vashıngtonnyń Tegeran talaptaryna kelisýine baılanysty ekenin jeke málimdedi.
Qaqtyǵys bastalǵanǵa deıin Ormýz buǵazy arqyly álemdegi munaı men suıytylǵan tabıǵı gaz jetkizilimderiniń shamamen besten biri ótetin. Keme qatynasyndaǵy úzilister tasymal qunynyń ósýine ákelip, álemdik energııa baǵasyna qysymdy kúsheıtti.
Buǵan deıin AQSh kedergisiz kommertsııalyq keme qatynasyn qamtamasyz etetin kelisim jasalǵan jaǵdaıda Iran porttaryna qoıylǵan blokadany alyp tastaýǵa daıyn ekenin málimdegen.
Eske sala ketspek, Iran men Oman Ormýz buǵazy arqyly ótetin usynylǵan baǵyttyń geografııalyq koordınattaryn da kelisip qoıǵan. Alaıda Tegeran buǵaz arqyly ótetin barlyq kemege qaýipsiz jol júrýge kepildik berý múmkin emes ekenin eskertti.
Sondaı-aq Ormýz buǵazyndaǵy shıelenis munaı baǵasynyń ósýine áser etkenin de jazdyq.
