Iran men Oman Ormýz buǵazy arqyly ótetin teńiz baǵyttarynyń kartasy boıynsha kelisti
ASTANA. KAZINFORM — Iran Syrtqy ister mınıstrliginiń baspasóz hatshysy Ismaıl Baǵaı Tegeran men Maskattyń Ormýz buǵazyna qatysty kelissózderinde ilgerileýshilik bar ekenin málimdedi. Onyń aıtýynsha, konsýltatsııalar «oń ári syndarly» jaǵdaıda ótip jatyr, dep habarlaıdy Anadolu.
Baǵaıdyń sózinshe, Iran men Oman buǵaz arqyly teńiz kemeleriniń qozǵalys baǵyttaryn aıqyndaıtyn karta boıynsha kelisimge kelgen. Alaıda taraptardyń birlesken málimdemesine qatysty tehnıkalyq máseleler áli de pysyqtalyp jatyr.
Baǵaı sondaı-aq Vashıngtondy kelissózder úderisine kedergi keltirip otyr dep aıyptady.
Iran men Oman arasyndaǵy kelissózder Ormýz buǵazy mańyndaǵy jaǵdaı shıelenisip turǵan kezde júrgizilýde. Buǵan deıin Tegeran strategııalyq sý jolyn tolyq ashý úshin AQSh birqatar shartty oryndaýy qajet ekenin málimdegen bolatyn.
Iran Syrtqy ister mınıstriniń orynbasary Kazem Garıbabadı Omanmen kelissózder sońǵy kezeńge jetkenin habarlady. Onyń aıtýynsha, eki el eki-tórt aı aralyǵynda qoldanylýy múmkin ýaqytsha teńiz baǵytyn qurý máselesin talqylap jatyr.
Iran Syrtqy ister mınıstri Abbas Arakchı de Tegeran men Maskattyń teńiz qatynasynyń jańa tártibi boıynsha kelisimge jaqyndaǵanyn málimdedi. Alaıda onyń aıtýynsha, Ormýz buǵazyn ashý Vashıngtonnyń Iran qoıǵan basqa da sharttardy oryndaýyna baılanysty bolady.
Ormýz buǵazy – álemdegi energetıkalyq resýrstardy tasymaldaýdyń negizgi baǵyttarynyń biri. Sondyqtan buǵazdaǵy keme qatynasyna qatysty jaǵdaı halyqaralyq naryqtar men jahandyq energetıkalyq qaýipsizdik úshin mańyzdy mánge ıe.
Buǵan deıin AQSh prezıdenti Ormýz buǵazyn amerıkalyq aýmaq dep jarııalaýdy josparlap otyrǵany habarlanǵan edi. Mundaı shara óńirde amerıkalyq áskerdi belgisiz merzimge ornalastyrýdy talap etýi múmkin. Iran AQSh-tyń buǵazdy baqylaýda ustaıtynyn joqqa shyǵardy.
Sondaı-aq buǵan deıin buqaralyq aqparat quraldary Iran men Omannyń Ormýz buǵazyna qatysty kelisimge jaqyndaǵanyn habarlaǵan bolatyn.
