Iran men Oman Ormýz buǵazy arqyly kemelerdiń júrý baǵytyn kelisti
ASTANA. KAZINFORM — Iran men Oman Ormýz buǵazy arqyly kemelerdiń qatynaýyna arnalǵan jańa baǵyt boıynsha kelisimge keldi. Bul týraly Euronews habarlady.
— Eki tarap usynǵan baǵyttyń geografııalyq koordınattary tolyq kelisildi. Úshinshi taraptar bul úderiske kedergi keltirmese, qol jetkizilgen negizgi ýaǵdalastyqtardy qamtıtyn Iran men Omannyń birlesken málimdemesi de jaqyn arada jarııalanady, – dedi Iran Syrtqy ister mınıstrliginiń resmı ókili Esmaıl Baǵaı.
Bul týraly Irannyń memlekettik BAQ-tary habarlady.
Onyń sózinshe, Omanmen júrgizilgen kelissózder kásibı deńgeıde ótip, naqty nátıjelerge qol jetkizilip jatyr. Degenmen Iran tarapy Ormýz buǵazy arqyly qatynaıtyn barlyq kemeniń qaýipsizdigine tolyq kepildik bere almaıtynyn málimdedi.
Ormýz buǵazy – álemdik teńiz saýdasyndaǵy strategııalyq mańyzy zor dálizderdiń biri. Bul baǵyt arqyly dúnıejúzilik teńiz jolymen tasymaldanatyn munaıdyń shamamen tórtten biri, suıytylǵan tabıǵı gazdyń eleýli kólemi jáne álemdik karbamıd eksportynyń úshten birine jýyǵy ótedi.
Eske salaıyq, buǵan deıin Ormýz buǵazy arqyly negizgi taýar eksporty 54%-ǵa qysqarǵanyn habarlaǵan edik.
