Iran men Qazaqstan logıstıkasy qalaı ózgeredi — mınıstr jaýaby

ASTANA. KAZINFORM — Kólik mınıstri Nurlan Saýranbaev Iranǵa baǵyttalǵan júk jóneltimderi men logıstıka ahýaly týraly suraqtarǵa jaýap berdi.

Tilshiler sońǵy jyldary Iran men Qazaqstan arasynda logıstıka qarqyndy damyǵanyn, Soltústik-Ońtústik baǵyty arqyly, temirjol jáne teńiz joldary arqyly tasymal kóbeıgenin eske salyp, endi logıstıka qalaı ózgeretinin surady.

— Soltústik-Ońtústik baǵyty qandaı jaǵdaı bolsa da, Qazaqstan úshin strategııalyq basymdyq bolyp qala beredi, biraq bul shıelenistiń qorytyndysyna qaraımyz, — dep jaýap berdi N. Saýranbaev Úkimette ótken brıfıngte.

Mınıstrdiń aıtýynsha, qazirgi tańda júk jóneltýshiler Parsy shyǵanaǵyna baǵyttalǵan júkterin ustap otyr.

Sonymen birge, Kólik mınıstri «Shekarada qalyp qoıǵan júkter bar ma?» degen suraqqa jaýap berdi.

— Bul qaqtyǵys birtindep kúsheıgenin eskersek, negizgi júk jóneltýshiler aldyn ala jóneltimdi tejep otyrdy. Sondyqtan eger júk keptelisi nemese keshigýi bolǵan jaǵdaıda sizder ony estir edińizder, buqaralyq aqparat quraldarynda shý kóteriler edi. Qazirgi ýaqytta Iran baǵyty boıynsha eshqandaı kidiris joq, — dedi mınıstr.

Aıta keteıik, Iran aýmaǵynda qalǵan Qazaqstan azamattary jerdegi avtokólikter arqyly elge jetkizilmek.