Iran men Qazaqstan ıslamdy terrorızmmen jáne jıhadızmmen baılanystyratyn qaterlermen birlese kúresýge ýaǵdalasty

ASTANA. QazAqparat - Iran men Qazaqstan ıslamdy terrorızmmen jáne jıhadızmmen baılanystyrý sııaqty qaterlermen birlese kúresýge ýaǵdalasty. Bul týraly búgin Aqordada Iran Islam Respýblıkasynyń Prezıdenti Hasan Rýhanımen kelissózderden keıin birlesken málimdeme jasaǵan Elbasy Nursultan Nazarbaev aıtty, dep habarlaıdy QazAqparat.

Iran Astanada ótetin EKSPO-2017 kórmesine qatysyp, balamaly energııa salasyndaǵy ózderiniń jetistikterin kórsetetindigin aıta kele Qazaqstan Prezıdenti: «Biz birqatar ózekti halyqaralyq jáne óńirlik  máseleler jóninde de pikirlestik. Islamofobııanyń taralýy, dinimizdi terrorızmmen jáne jıhadızmmen baılanystyrý sııaqty qaterlermen kúres jolynda birlesip, jumys isteýge ýaǵdalastyq. Qaterli qubylysqa aınalǵan halyqaralyq terrorızm men ekstremızmge, qylmystyń ózge de túrlerine qarsy kúreste tyǵyz yntymaqtastyq ornatýǵa kelistik», - dedi.

Memleket basshysy búgingi kelissózder barysynda  eki eldiń BUU, IYU, Azııa keńesi, ShYU sııaqty halyqaralyq uıymdar aıasynda saıası yqpaldastyǵyn nyǵaıtýǵa da kelisim bolǵanyn basa aıtty.  

«Iran memleketi Eýrazııalyq ekonomıkalyq odaq aıasynda qarym-qatynas jasaýǵa, ShYU tóńireginde qatynas jasaýǵa, múshesi bolýǵa múddeli ekendigin baıandady. Biz bul umtylysyn qoldaıtyn bolamyz. Talqylanǵan barlyq másele boıynsha ózara ortaq túsinistikke  qol jetkizgenimizdi basa aıtqym keledi. Osynyń barlyǵy eki eldiń kózqarasy men ustanymdarynyń uqsas ekendigin, ózara múddelerimizdiń birge ekendigin dáleldeıdi. Jalpy, barlyq sala boıynsha Qazaqstan men Iran qarym-qatynasyn nyǵaıtýǵa múmkindik mol. Bul eki elge de birdeı paıdaly», - dedi Nazarbaev.