Iran men Qazaqstannyń EAEO-men erkin saýda týraly kelisimi jańa ekonomıkalyq múmkindikter ashady — Pezeshkıan
ASTANA. KAZINFORM — Iran men Eýrazııalyq ekonomıkalyq odaq arasyndaǵy erkin saýda týraly tolyqformatty kelisim ekonomıkalyq yntymaqtastyqty keńeıtýge jańa múmkindikter ashady. Bul týraly Iran Islam Respýblıkasynyń Prezıdenti Masýd Pezeshkıan QR Prezıdentiniń Teleradıokeshenine bergen eksklıýzıvti suhbatynda aıtty.
Pezeshkıannyń aıtýynsha, Tegerannyń Eýrazııalyq baqylaýshy formatqa qosylýy eldiń óńirlik ekonomıkalyq keńistiktegi qatysýyn kúsheıtip, saýda aǵyndaryn jandandyrýǵa jaǵdaı jasady.
— Biz eýrazııalyq baqylaýshy formatyna qosylǵandyqtan, osy keńistikte bolýymyz qamtamasyz etildi. Eýrazııanyń ekonomıkalyq ortasy elderimiz úshin de, bul formattyń barlyq qatysýshylary úshin de jańa múmkindikter ashady, — dep atap ótti Iran kóshbasshysy.
Onyń aıtýynsha, Irannyń shamamen 90 mıllıon adamnan turatyn úlken naryǵy bar, bul óz kezeginde Qazaqstanǵa aıtarlyqtaı aýqymdy múmkindik dep sanaıdy.
— Iran úshin de Qazaqstan men EAEO elderinde ekonomıkalyq qarym-qatynasty keńeıtýge qolaıly orta qalyptasyp jatyr. Tarıftik kedergilerdi joıý arqyly mundaı platforma kásipkerlerge, ónerkásipke jáne óndirýshilerge tıimdi tetikke aınalady, sondaı-aq ózara is-qımyl men ózara qoldaýdy jeńildetedi, — dedi Masýd Pezeshkıan.
Irannyń ońtústiginde qazaqstandyq logıstıkalyq ortalyq qurylyp jatyr.
— Eki el arasyndaǵy Soltústik-Ońtústik dáliziniń damýyna qalaı áser etedi degenge ıkeler bolsaq, osy maqsattardy júzege asyrý úshin elderimiz ben Eýrazııa memleketteri arasynda birlesken kólik toraptary bolýy kerek. Bul baǵyttar teńiz, temirjol jáne áýe joly arqyly qurylýy múmkin. Eger Qazaqstannan portqa qaraı temirjol baǵytyn keńeıte alsaq, ońtústik portymyzda baýyrlas ári dostyq qatynastaǵy Qazaqstan úshin logıstıkalyq ortalyq qurylady. Osy baǵyttaǵy jobalar aldymyzǵa qoıǵan ekonomıkalyq jáne mádenı maqsattarǵa qol jetkizýdi áldeqaıda jeńildetedi, — dedi Iran prezıdenti.
Onyń aıtýynsha, Parsy shyǵanaǵyna, Úndi muhıtyna, sondaı-aq shyǵys pen batys baǵyttaryna shyǵý joldaryn qamtamasyz etý úshin barlyq qajet qadamdardy birlesip iske asyrýǵa daıynbyz. Bul jospar mádenı, ekonomıkalyq, saıası jáne qaýipsizdik salasyndaǵy qarym-qatynasqa berik negiz qalaıdy.
Suhbattyń tolyq nusqasyn myna siltemeden oqı alasyz.