Iran men Izraılden 300-den astam qazaqstandyq jetkizildi

ASTANA. KAZINFORM — Syrtqy ister mınıstrliginiń resmı ókili Aıbek Smadııarov Qazaqstan Iran men Izraılde bolǵan 300-den astam azamatyn elge qaıtarǵanyn málim etti. 

— Qazaqstannyń Syrtqy ister mınıstrligi memlekettik organdardyń jáne sheteldik seriktesterdiń qoldaýymen Iran men Izraılden Qazaqstan azamattaryn evakýatsııalaýdyń kezekti kezeńin aıaqtady. Jalpy, Irannan 233 Qazaqstan azamaty, al Izraılden 103 otandasymyz shyǵaryldy, — dedi Aıbek Smadııarov elordada ótken baspasóz máslıhatynda.

Onyń aıtýynsha, mınıstrlik pen elshilikter óńirdegi jaǵdaıdy táýlik boıy baqylap, azamattarǵa qajet konsýldyq qoldaý kórsetýdi jalǵastyryp jatyr.

— Áleýmettik jelide kóptegen suraq boldy. Biz bul jaǵdaıdy áýejaılarda kórdik. Mysaly, Doha áýejaıyna toqtalsaq, sol kezde Qatarda shamamen 45 myń týrıst shyǵa almaı qaldy, ıaǵnı 2-3 kún boıy túsiniksiz jaǵdaı boldy. Óıtkeni avıakompanııalardyń ushaqtary usha almady, áýe joldary jabyq boldy. Soǵan qaramastan, tirkeýde turǵan 150 azamatymyz naǵyz «shoý» kórsete bildi. Olar «Úkimet qaıda qarap otyr? Ushaqtar qaıda, bizge nege jaǵdaı jasamaıdy, bes juldyzdy qonaq úılerimiz qaıda?» dep biraz ábigerge saldy. Bul jaǵdaıda adamdar álemde ne bolyp jatqanyn túsinýi kerek qoı?! Eń bastysy, osy talaptardan buryn elge aman-esen jetý kerek. Al elge kelgennen keıin áýe kompanııasyna jáne týrıstik kompanııalaryńyzǵa kez kelgen shaǵym túsire alasyz. Sol óńirdegi ahýaldy jaqsy túsiný kerek! Biraq azamattar bizdiń elshilikti ózderiniń shaǵymdarymen úıip tastady, — dedi resmı ókil.

Bir apta buryn Qazaqstan Iran men Izraılden 290-nan astam azamatyn aldyrǵany málim boldy.