Iran men Izraıl arasyndaǵy úzdiksiz soqqydan taǵy birneshe adam qaza tapty

ASTANA.KAZINFORM - Iran men Izraıl arasyndaǵy úzdiksiz soqqydan taǵy qansha adam qurban boldy. dúısenbige qaraǵan túni Izraıldiń ortalyq jáne soltústigindegi shabýyldardan keminde segiz adam qaza taýyp, taǵy 300-ge jýyq adam jaralandy, dep habarlaıdy Kazinform menshikti tilshisi.

Izraıl tótenshe jaǵdaılar qyzmetiniń habarlaýynsha, Irannyń Petah Tıkva, Haıfa jáne Bneı-Brak aýdandaryna jasalǵan zymyran shabýylynan úsh áıel men bes er adam, onyń ishinde qart adamdar qaza tapty. Haıfa qalasynda úıindi astynan úsh máıit tabylǵan.

-Úsheýi de strategııalyq mańyzdy nysanda jumys istegen. Biz ony kópten beri turǵyn aýdannan kóshirý kerek dep eseptep júrgenbiz, - dedi Ion ıAhav qalasynyń meri Izraıldiń 12 arnasyna bergen suhbatynda.

Izraıl bıligi qaza tapqandardyń jalpy sany 287, onyń ishinde áınek synyqtarynan jaraqat alǵan balalar da bar dep málimdedi. Shnaıder balalar aýrýhanasynda eki naýqastyń jaǵdaıy ortasha aýyr, taǵy bir eresek adamnyń jaǵdaıy aýyr. Qalǵandary jeńil jaraqat alǵandar.

TsAHAL túngi shabýyl kezinde Izraılge shamamen 40 ballıstıkalyq zymyran atylǵanyn habarlady. Juma kúni qaqtyǵys bastalǵannan beri Iran 350-ge jýyq zymyran ushyrdy, onyń 24-i adam shyǵynyna sebepshi boldy, dep habarlaıdy Izraıl qorǵanys kúshteri.

Sondaı-aq Izraıl áskeri Sa'ar 6 klasty korvetterde ornalastyrylǵan BARAK MX jańa áýe qorǵanysy júıesin paıdalana otyryp, teńiz ústinde segiz ushqyshsyz ushaqty ustaǵanyn habarlady. Iemen aýmaǵynan ushyrylǵan taǵy bir zymyran Izraıl shekarasyna jetpeı qulap, ashyq jerge qondy.

Osynyń aıasynda Izraıldiń qorǵanys mınıstri Israel Kats Tegeran «jaqyn arada qunyn tóleıtinin» aıtty.

Izraıldiń Iran jerine áýe shabýyldary jalǵasyp jatyr. TsAHAL Izraıl áýe kúshteri Tegerandaǵy «Kýds» kúshteriniń komandalyq ortalyqtaryna soqqy bergenin habarlady.

Irannyń Tasnim aqparat agenttiginiń habarlaýynsha, Zendjan provıntsııasyndaǵy soqqydan Islam revolıýtsııasy Saqshylar korpýsynyń qolbasshysy Reza Nadjafı men sarbaz Hasan Rasýlı qaza tapqan. Izraıldiń jumadan beri Iranǵa jasaǵan soqqylarynan barlyǵy 220-dan astam adam, sonyń ishinde áıelder, balalar jáne joǵary laýazymdy áskerıler qaza tapty.

Buǵan qosa, Iran jeksenbi kúni Izraıldiń «Mossad» barlaý agenttigine tyńshylyq jasaǵany úshin kináli dep tanylǵan adamdy ólim jazasyna kesti. Ol Esmaıl Fekrı bolatyn. Bul sońǵy aptalarda tyńshylyq jasady degen aıyppen oryndalǵan úshinshi ólim, dep habarlaıdy ırandyq BAQ.

AQSh prezıdenti Donald Tramp shıeleniske alańdaýshylyq bildirdi jáne taraptardy shıelenisti azaıtýǵa shaqyryp, «kelisimnen úmittenetinin» aıtty, biraq Amerıka Qurama Shtattary Izraıldi qoldaýdy jalǵastyrady dep sendirdi.

Izraıl qorǵanys kúshteri taǵy da halyqty Іshki maıdan qolbasshylyǵynyń nusqaýlaryn oryndap, áýe shabýyly sırenalary estilgen kezde jasyrynýǵa shaqyrdy, ásirese Irannyń atqylaýynyń negizgi nysanasy sanalatyn Tel-Avıv, Haıfa jáne Bır-Sheba aýdandarynda.

Bir kún buryn Izraıldiń AQSh-ty Iranmen soǵysýǵa shaqyrǵany týraly aqparat taraǵan bolatyn.

Sonymen birge Izraıl Irannyń ıadrolyq jobasynyń ınfraqurylymyna soqqylaryn aıaqtaǵanyn habarlady.

Osyǵan deıin Tramptyń Izraıl men Iran arasynda beıbitshilik ornatýǵa ýáde bergeni týraly jazdyq.