Iran men Izraıl arasyndaǵy qaqtyǵystyń Tegeran nusqasy qandaı
ASTANA. KAZINFORM – Iran Islam Respýblıkasynyń Qazaqstandaǵy Tótenshe jáne Ókiletti Elshisi Alı Akbar Djoýkar qazaqstandyq BAQ ókilderimen kezdesýde Izraılmen aradaǵy áskerı qaqtyǵystyń Tegeran nusqasyn málim etti.
«Keıingi 2-3 aptanyń ishinde Qazaqstanda bolmaǵan edim. Sol kezeńde álemde biraz oqıǵa boldy. Izraıl Iran Islam Respýblıkasynyń Damaskidegi konsýldyq ǵımaratyna áskerı shabýyl jasady. Osy shabýylda Sırııa memleketine terrorızmmen kúreste kómektesip júrgen áskerı keńesshiler qatarynan 7 adam óldi.
Ózderińiz bilesizder, osydan buryn da Izraıl Sırııada, basqa da elderde Iran azamattaryna shabýyl jasaǵan edi. Biraq osy jolǵy shabýyldyń ereksheligi – Irannyń resmı dıplomatııalyq ókildigine shabýyl jasaldy. Bul áskerı shabýyldy Batys ujymynan basqa álemniń barlyq derlik eli aıyptady. Árıne, Qazaqstan da dıplomatııalyq ókilderge jasalǵan shabýyldy qatań synady. Óıtkeni dıplomatııalyq nysandar Vena konventsııasy boıynsha qorǵaýǵa alynǵan», - dedi ol.
Dıplomat bul áskerı shabýyldy Birikken Ulttar uıymynyń Qaýipsizdik keńesi aıyptamaǵanyna nazar aýdardy.
«Qaýipsizdik keńesi óz mindetin oryndap, osy shabýyldy aıyptaǵan bolsa, Iran Islam Respýblıkasy tikeleı áskerı jaýap bermes pe edi... Irannyń dıplomatııalyq nysanyna shabýyldy Irannyń terrıtorııalyq tutastyǵyna, egemendigine degen shabýyl dep esepteımiz. Sondyqtan, BUU-nyń Qaýipsizdik keńesi men Batys elderi bul aktini aıyptamaǵandyqtan Irannyń strategııalyq sabyry bitip, tikeleı jaýap berý jóninde sheshim qabyldady. Iran Islam Respýblıkasynyń bul jaýaby ózin-ózi qorǵaý erejelerine, BUU-nyń Jarǵysyna saı keledi. Irannyń áskerı shabýyly shekteýli boldy. Iranǵa qarsy shabýyl jasaǵan áskerı avıabazany jáne sol jerdegi Iranǵa qarsy tyńshylyq áreketter atqarylǵan bazany kózdedi. Osy qarymta shabýyldan keıin Iran áskerı árekettiń aıaqtalǵanyn, Izraıl taǵy áskerı shara qabyldasa, óte qatań jaýap beretinin málimdedi», - dedi Alı Akbar Djoýkar.
Eske salaıyq, sáýirdiń ortasyna qaraı Iran Izraıl aýmaǵyna ushqyshsyz ushatyn apparattarmen joıqyn soqqy uıymdastyrǵan bolatyn.
