Iran men Irak shekarasyndaǵy zilzaladan 6 adam qaıtys boldy

ASTANA. QazAqparat - Jeksenbi kúni Iran men Irak shekarasyndaǵy 7,4 magnıtýdalyq qýatty jer silkinisinen keminde 6 adam qaıtys bolyp, ondaǵan adam zardap shekti, dep jazady TASS.

Jeksenbi kúni keshkisin Iran men Irak shekarasynda 7,4 magnıtýdalyq jer silkinisi boldy. Eýropalyq-Jerorta teńizi seısmologııalyq ortalyǵynyń habarynsha, jerasty dúmpýiniń oshaǵy Irannyń Sarpol-e-Zahab qalasynan soltústikke qaraı 32 km qashyqtyqta jáne Iraktyń Sýleımanııa qalasynan ońtústik shyǵysqa qaraı 100 km qashyqtyqta bolǵan. Tereńdigi 10 km.

Jer silkinisi Iraktyń kóptegen provıntsııalary, sonyń ishinde Baǵdat arqyly ótti. Jerasty dúmpýleri jer silkinisiniń oshaǵynan 200 km aımaqta jatqan Kýveıtte de sezildi. Tabıǵat apaty bolǵan aımaq turǵyndary úılerin tastap shyqty.