Iran men Ázerbaıjan ortaq shekaralyq jobalardy júzege asyrýdy jedeldetpek
ASTANA. KAZINFORM – Iran men Ázerbaıjan arasyndaǵy ekijaqty yntymaqtastyqty jandandyrý aıasynda taraptar ortaq shekaradaǵy negizgi ınfraqurylymdyq jobalardy júzege asyrýdy jedeldetý týraly kelisimge keldi, dep habarlaıdy Kazinform tilshisi Tasnim News-ke silteme jasap.
Irannyń Jol jáne qala qurylysy mınıstri Farzana Sadeg pen Ázerbaıjan premer-mınıstriniń orynbasary Shahın Mustafaevtyń resmı kezdesýinde ekonomıkalyq jáne ákimshilik yntymaqtastyq perspektıvalary talqylandy. Birlesken transshekaralyq jobalardy júzege asyrýǵa erekshe nazar aýdaryldy.
Taraptar Astaradaǵy shekaralyq termınal qurylysyn, sondaı-aq shekaradaǵy kópir ınfraqurylymyn aıaqtaý jumystaryn jedeldetý qajettigin atap ótti. Bul jobalar taýar aınalymyn arttyrý jáne óńirlik logıstıkany nyǵaıtý úshin strategııalyq mańyzdy sanalady.
Qol jetkizilgen kelisimder aıasynda Shahın Mustafaevtyń Irannyń Astara qalasyna barýy josparlandy. Sapar barysynda Ekonomıkalyq yntymaqtastyq jónindegi birlesken komıssııanyń otyrysy ótedi, onda birlesken bastamalardy júzege asyrýdaǵy ilgerileýshilik baǵalanady.
Joǵary deńgeıdegi kezdesýler qazirgi kezdegi kedergilerdi joıý, jobalardy odan ári ilgeriletý jáne memleketaralyq yntymaqtastyqty tereńdetý jóninde pikir almasý alańyna aınalady dep kútilip otyr.
Eske sala keteıik, osyǵan deıin Ázerbaıjan men Iran Kaspıı teńizinde kommertsııalyq keme qatynasyn qalpyna keltirgenin habarlaǵan edik.