Iran men «altylyq» tarıhı kelisimge qol jetkizdi
ASTANA. 24 qarasha. QazAqparat - Jenevada Iran men álemniń alty derjavasy arasynda ıadrolyq baǵdarlama boıynsha kelisimge qol jetkizildi, dep habarlady RBK.
Qol jetkizilgen ýaǵdalastyq jaıynda atalǵan kelissózge qatysqan birneshe delegatsııa birden málimdedi. «Biz kelisimge keldik», dep jazdy Irannyń Syrtqy ister mınıstri Muhammed Zafır óziniń Twitter-degi shaǵyn blogyna. Bul aqparatty Frantsııa Syrtqy ister mınıstri Loran Fabıýs ta qýattap, taraptardyń ıadrolyq kelisim jasasqanyn jarııalady. Irannyń kelisimniń bir bóligin júzege asyrý úshin 4,2 mlrd. dollar kóleminde shetel valıýtasyna qol jetkizetindigi habarlanýda. Reseı SІM basshysy Sergeı Lavrovtyń aıtýyna qaraǵanda, MAGATE Tehrannyń ıadrolyq baǵdarlamasyna baqylaýdy aıtarlyqtaı keńitetin bolady. Al Iran Arakadaǵy reaktordy jabdyqtaýdy toqtatýy tıis. Kelisimde 20 paıyzdyq baıytylǵan ýran qory kelisim jasalǵannan keıingi alty aıdyń ishinde joıylýy tıis. Odan ary Iran ýrandy bes paıyzdan joǵaryǵa baıyta almaıdy. Dál osy kezeńde Islam Respýblıkasyna qarsy buǵan deıin engizilgen altyn, munaı hımııasy, avtomobılge qatysty sanktsııalar jeńildetiletin bolady. AQSh-tyń Iran Ortalyq bankine qarsy engizgen sanktsııasy ázirshe óz kúshinde qalady. AQSh Prezıdenti Barak Obama kelisimge qol qoıylǵannan keıin Kongresti Iranǵa qatysty jańa sanktsııalar engizbeýge shaqyrdy. Islam Respýblıkasy jarty jyl ishinde óz mindettemelerin oryndamaǵan jaǵdaıda ǵana qysym jasalady. Aıta keteıik, Irannyń ıadrolyq baǵdarlamasyna qatysty kelissózderdiń kelesi kezeńi 23 qarashada Jenevada bastalǵan bolatyn. Oǵan Iran, Ulybrıtanııa, AQSh, Reseı, Frantsııa, Germanııa jáne Qytaı ókilderi qatysty.
