Iran men AQSh ıadrolyq baǵdarlama boıynsha Oman astanasynda kelissózdi bastady
ASTANA. KAZINFORM – Kelissózder óńirlik shıelenisti báseńdetýge baǵyttalǵan. Bul týraly Kazinform agenttiginiń menshikti tilshisi habarlaıdy.
12 sáýir kúni Omannyń astanasy Maskat qalasynda Iran Islam Respýblıkasy men Amerıka Qurama Shtattarynyń ókilderi arasynda kelissóz bastaldy. Taraptar Irannyń ıadrolyq baǵdarlamasyna qatysty máselelerdi talqylaýda. Atalǵan kezdesý óńirdegi shıelenistiń órshı túsýimen baılanysty ótip jatyr.
IRNA aqparat agenttiginiń habarlaýynsha, Iran delegatsııasy syrtqy ister mınıstri Abbas Aragchıdiń basshylyǵymen tańerteń Tegerannan Maskatqa ushyp shyqqan. Maskatqa kelgennen keıin Aragchı Oman Sultanatynyń joǵary laýazymdy ókilderimen kezdesý ótkizdi.
— Iran delegatsııasy syrtqy ister mınıstri Abbas Aragchıdiń jetekshiligimen Iran men AQSh arasyndaǵy kelissózderdiń ótetin orny — Maskatqa jol tartty, - dep habarlady IRNA agenttigi.
Tasnim agenttiginiń málimetinshe, kelissóz janama túrde ótedi jáne Omannyń syrtqy ister mınıstri Badr bın Hamad ál-Býsaıdı araǵaıyndyq etedi. Konsýltatsııanyń alǵashqy kezeńi tústen keıin atalǵan mınıstrmen bastalmaq.
Kelissózde AQSh tarapynan prezıdenttiń Taıaý Shyǵys boıynsha arnaıy ókili Stıv Ýıtkoff qatysyp jatyr. Vashıngton Irannyń ıadrolyq baǵdarlamasynyń áskerı baǵyttarynan bas tartýǵa kepildik berýdi talap etedi. Aq úıdiń baspasóz hatshysy Kerolaın Lıvıttiń aıtýynsha, AQSh «dıplomatııaǵa daıyn, alaıda eger kelisimge qol jetkizilmese, qysym sharalardy joqqa shyǵarmaıdy».
Al Iran óz kezeginde «naqty jáne ashyq dıalogqa daıyn ekenin» atap ótti.
— Biz shynaıy túrde jáne sergektikpen dıplomatııaǵa naqty múmkindik berip otyrmyz. AQSh bul sheshimdi baǵalaýy tıis, óıtkeni sheshim olardyń qatań rıtorıkasyna qaramastan qabyldandy, - dedi Iran Islam Respýblıkasynyń Syrtqy ister mınıstrliginiń resmı ókili Esmaıl Baǵaı.
Oman dástúrli túrde Tegeran men Vashıngton arasyndaǵy beıtarap deldal rólin atqaryp keledi. Qazirgi kelissóz shıelenisti seıiltýge jáne ıadrolyq, sondaı-aq óńirlik máseleler boıynsha keń aýqymdy dıplomatııany qaıta bastaýǵa yqtımal qadam retinde qarastyrylyp otyr.
Sonymen qatar bul konsýltatsııalar Taıaý Shyǵystaǵy daǵdarystyń ýshyǵýy jaǵdaıynda ótýde. Oǵan Gaza sektorynda jáne Ońtústik Lıvanda jalǵasyp jatqan áskerı qaqtyǵystar, sondaı-aq Iran men Izraıl arasyndaǵy ózara qaýip-qaterge sebep. Osy oraıda, Tegeran óńirdegi AQSh bazalaryna qatysty «aýyr saldary» bolatyny týraly eskertý jasady.
Aıta ketsek, kelissózden birer kún buryn AQSh Iranǵa qarsy jańa sanktsııalar engizgen edi.
Sondaı-aq Kazinform tilshisi «AQSh pen Iran: jańa strategııa joly qaısy» taqyrybyn jan-jaqty taldap kórdi.