Iran men AQSh Pákistandaǵy kelissózderde soǵysty toqtatý týraly kelisimge kele almady
ASTANA. KAZINFORM — AQSh vıtse-prezıdenti Djeı Dı Vens Pákistannan ushyp ketti. Onyń aıtýynsha, Iranmen 21 saǵattan astam ýaqytqa sozylǵan shıelenisti kelissózder soǵysty toqtatýǵa baǵyttalǵan beıbit kelisimge ákelmedi, dep jazdy VVS.
— Biz Iran ókilderimen birneshe mazmundy pikirtalastar ótkizdik, bul — jaqsy jańalyq. Al nashar jańalyq — kelisimge kele almadyq, jáne meniń oıymsha, bul Iran úshin AQSh-pen salystyrǵanda áldeqaıda úlken problema, — dedi Vens. — Biz jaı ǵana Irannyń bizdiń sharttarymyzdy qabyldaıtyn jaǵdaıǵa kele almadyq, — dep qosty AQSh vıtse-prezıdenti.
Vens kelissózderde negizgi másele retinde ıadrolyq qarý máselesi turǵanyn atap ótti. Onyń aıtýynsha, AQSh prezıdenti Tramptyń basty maqsaty — Tegerannyń qazirgi jáne bolashaqta ıadrolyq qarýǵa ıe bolýyna jol bermeý. Islamabadtaǵy kezdesýlerde AQSh tarapynan Irannyń ıadrolyq qarý jasaýdan bas tartatynyna naqty ýáde alǵan joq.
Sońǵy 24 saǵat ishinde kelissózder Ormýz buǵazy, ıadrolyq baǵdarlama, áskerı ótemaqylar, sanktsııalardy joıý jáne Iranǵa jáne óńirdegi soǵysty tolyq toqtatý sııaqty negizgi taqyryptardyń ártúrli aspektilerin taldaýǵa arnaldy.
