Iran men AQSh Oman elinde ıadrolyq kelissózderdi qaıta bastady

ASTANA. KAZINFORM — Tegeran sanktsııalardyń jeńildetilýin jáne beıbit ıadrolyq energııany paıdalaný quqyǵyn alýǵa umtylyp otyr, dep habarlaıdy Kazinform agenttiginiń menshikti tilshisi. 

Iran men AQSh-tyń basty kelissóz júrgizýshileri Tegerannyń ıadrolyq baǵdarlamasyna qatysty kelispeýshilikterdi talqylaýdy qaıta bastady, dep habarlaıdy Irannyń IRNA agenttigi. Kezdesý AQSh prezıdenti Donald Tramptyń Taıaý Shyǵysqa sapary qarsańynda Vashıngton ustanymynyń qatańdaýy aıasynda ótip jatyr.

Eki tarap ta dıplomatııalyq joldy qoldaıtynyn málimdegenimen, Tegeran men Vashıngton arasynda jańa ıadrolyq kelisimge qol jetkizý jáne áskerı qaqtyǵystyń aldyn alý úshin sheshilýi tıis mańyzdy máseleler boıynsha tereń qarama-qaıshylyqtar saqtalyp otyr.

Irannyń syrtqy ister mınıstri Abbas Arakchı men Tramptyń Taıaý Shyǵys jónindegi arnaıy ókili Stıv Ýıtkoff Maskat qalasynda, Omannyń araǵaıyndyǵymen, kelissózderdiń tórtinshi kezeńin ótkizip jatyr. Bul kelissózder AQSh tarapynan aıtylǵan qatań málimdemelerge qaramastan ótip otyr. Tegeran mundaı rıtorıkany progreske kedergi retinde qabyldaıdy.

Iran sanktsııalardyń jeńildetilýine jáne beıbit ıadrolyq energııany damytý quqyǵynyń moıyndalýyna umtylatynyn málimdedi.

— Delegatsııa ıran halqynyń múddelerin qorǵaýǵa jáne beıbit atom salasyndaǵy jetistikterimizdi saqtaı otyryp, sanktsııalardyń joıylýyna qol jetkizýge bar kúshin salady, — dedi Iran Syrtqy ister mınıstrliginiń ókili Ismaıl Bakaı.

Kezdesý aldynda Arakchı Irannyń ýran baıytý quqyǵy «talqylaýǵa jatpaıtynyn» atap ótti.

— Irannyń naqty ustanymy bar, ol aıqyn qaǵıdalarǵa negizdelgen… Biz jeksenbi kúni ótetin kezdesýde belgili bir kelisimge kelemiz dep úmittenemiz, — dedi ol Iran teledıdaryna bergen suhbatynda.

Sondaı-aq ol kelissózder sheshýshi kezeńge jetedi dep úmit bildirdi:

— Búgin tańerteń Tegeranda qosymsha keńester ótkizdik, jáne osy raýndta mańyzdy nátıjege qol jetkizemiz dep senemiz.

Oman araǵaıyndyǵymen ótip jatqan kelissózder bir aı buryn bastalǵan aldyńǵy raýndtardyń jalǵasy bolyp tabylady. Taraptar birtindep ilgerileýshilik bar ekenin habarlaǵanymen, ýran baıytý quqyǵyna qatysty basty qaıshylyqtar saqtalyp otyr. Tegeran bul quqyqty talqylaýǵa kelmeıtin másele dep sanasa, Vashıngton ony «qyzyl syzyq» dep ataýda.

Buǵan deıin Maskat pen Rım qalalarynda úsh kelissóz raýndy ótken: alǵashqysy — 12 sáýirde Maskatta, ekinshisi — 19 sáýirde Rımde, úshinshisi — 26 sáýirde qaıtadan Maskatta.

3 mamyrǵa josparlanǵan kelesi kezdesý «logıstıkalyq sebepterge» baılanysty keıinge shegerildi, dep 1 mamyrda habarlady Oman Syrtqy ister mınıstri Badr ál-Býsaıdı.

Aıta ketelik Iran men AQSh arasyndaǵy dıalogtiń kelesi raýndy Omanda 11 mamyrda ótetini týraly jazǵan edik.