Iran men AQSh kelissóziniń jańa kezeńi 11 shildede Pákistanda ótedi
ALMATY. KAZINFORM — Iran men AQSh arasyndaǵy kelissózderdiń kelesi kezeńi 11 shildede Pákistanda ótedi, dep habarlaıdy Anadoly.
Málimetke sáıkes, taraptar Pákistandaǵy kezdesýde Iranǵa qarsy sanktsııalardy alyp tastaý, buǵattalǵan aktıvterdi bosatý jáne ıadrolyq baǵdarlamaǵa qatysty máselelerdi talqylaıdy.
Sondaı-aq ırandyq delegatsııanyń quramy 9 shildede AQSh pen Izraıldiń 28 aqpandaǵy shabýyly saldarynan qaza tapqan eldiń burynǵy kóshbasshysy aıatolla Álı Hameneıdi eske alý rásimderi aıaqtalǵannan keıin belgili bolatyny aıtyldy.
Iran men AQSh arasynda 14 maýsymda qol jetkizilgen ýaǵdalastyqqa sáıkes, taraptar 60 kún ishinde Iranǵa qarsy sanktsııalardy jeńildetý, Ormýz buǵazyndaǵy jaǵdaı jáne ıadrolyq másele boıynsha kelissózder júrgizýi tıis bolǵan.
Alaıda osy kelissózder aıasynda 21 maýsymda Shveıtsarııada ótken kezdesý Izraıldiń Lıvandaǵy áskerı operatsııalarynyń jalǵasýy, AQSh-tyń Irannyń buǵattalǵan aktıvterin bosatýdan bas tartýy jáne Ormýz buǵazyn basqarý máselesine qatysty kelispeýshilikterge baılanysty jalǵaspady.
Soǵan qaramastan, Ormýz buǵazy mańyndaǵy qaqtyǵystardan keıin 1 shildede eki eldiń delegatsııalary Dohada Qatar ókilderimen jeke-jeke kezdesýler ótkizdi.
Buǵan deıin Qatar AQSh pen Iran arasyndaǵy janama kelissózderde ilgerileý bar ekenin málimdegen edi.
