Iran men AQSh kelissózderdiń úshinshi raýndyn ótkizdi
ASTANA. KAZINFORM – Taraptar negizgi ustanymdar, maqsattar men tehnıkalyq problemalardy talqylady. Tórtinshi raýnd kelesi senbige josparlanyp otyr, dep habarlaıdy Kazinform menshikti tilshisi.
Senbi, 26 sáýr kúni Iran men AQSh Oman astanasy Maskat qalasynda birneshe saǵatqa sozylǵan Irannyń ıadrolyq baǵdarlamasy boıynsha kelissózderdiń úshinshi raýndyn aıaqtady, IRNA.
Maskatta ótken aldyńǵy eki raýndtaǵydaı kelissózderdiń kóshbasshylary AQSh-tyń Taıaý Shyǵys boıynsha arnaıy ókili Stıv Ýıtkoff pen Irannyń Syrtqy ister mınıstri Abba Aragchı boldy. Omannyń Syrtqy ister mınıstri deldal rólin atqardy.
Kezdesýdiń aldynda jasalýy yqtımal kelisimniń tehnıkalyq jaǵyn talqylaýy tıis sarapshylar deńgeıinde Iran-Amerıka kelissózderi ótti. Eki el arasyndaǵy tehnıkalyq konsýltatıvtik kezdesý birneshe kún buryn ótýi tıis bolatyn, alaıda ol Maskattyń bastamashylyǵymen, taraptardyń kelisimimen senbige qaldyryldy.
Kezdesý qorytyndysy boıynsha, kelissózder barysynda deldal rólin atqarǵan Oman Syrtqy ister mınıstri Badr ál-Býsaıdı taraptar basty ustanymdar, maqsattar men tehnıkalyq problemalardy talqylaǵanyn atap ótti.
Onyń sózinshe, kelesiz kelissózder aldaǵy senbide, 3 mamyr kúni ótedi.
- AQSh pen Irannyń búgingi kelisimi ózara qurmet pen mindetterge negizdelgen kelisimge kelýge degen umtylysty baıqatty. Negizgi basymdyqtar, maqsattar men tehnıkalyq problemalar talqylandy. Kelissózder kelesi aptada jalǵasady, joǵary deńgeıdegi taǵy bir kelissóz aldyn ala 3 mamyrǵan josparlanǵan,- dep málimdedi ál-Býsaıdı.
Osyǵan deıin Iran ýrandy baıytý quqyǵy talqylaýǵa jatpaıtynyn málimdegen bolatyn.