Iran men AQSh kelissózi Oman astanasynda ótetin boldy

ASTANA. KAZINFORM – Irannyń syrtqy ister mınıstri Abbas Aragchı X jelisinde AQSh-pen ıadrolyq baǵdarlama boıynsha kelissózder «juma kúni Maskatta saǵat 10:00 [Grınvıch boıynsha 06:00] shamasynda» bastalýy tıis ekenin jazdy, dep habarlaıdy VVS.

Iran mınıstriniń sársenbi kúni keshke jarııalaǵan jazbasynan buryn Axios veb-saıtynda kelissózderdiń ótetin orny boıynsha kelispeýshilikterge baılanysty toqtatylatyny týraly habarlama jarııalandy. Buǵan deıin kelissóz Ystanbulda ótetini habarlanǵan edi.

Degenmen, keıinirek Axios Taıaý Shyǵystyń birneshe kóshbasshysynyń aralasýynan keıin kelissóz Maskatta ótetinin habarlady. Kelissózde Amerıka Qurama Shtattary atynan arnaıy elshi Stıv Ýıtkoff qatysady dep josparlanyp otyr. Ol buǵan deıin basqa da birqatar qaqtyǵysty sheshýge qatysyp júrgeni belgili.

AQSh pen Iran qatysýymen bolǵan birqatar oqıǵa aıasynda óńirdegi jaǵdaı shıelenisken kúıinde qalyp otyrǵanyn jazǵan edik.

Seısenbi kúni AQSh áskerı kúshteri Arabııa teńizinde Avraam Lınkoln áýe tasymaldaýshy kemesine jaqyndaǵan ırandyq ushqyshsyz ushý apparatyn atyp túsirdi. Bul týraly amerıkalyq resmı ókilge silteme jasap Reuters habarlady.

Tegeran Vashıngtonmen qarym-qatynasynyń shıelenisip turǵan tusynda dıplomatııalyq manevrlerge daıyn ekeni týraly belgi berdi.